ԵՊԲՀ այցելու պրոֆեսորը Digital Davos 2022 գագաթաժողովին ներկայացրեց «Առողջապահության ապագան» զեկույցը

Երևանի Մխիթար Հերացու անվան պետական բժշկական համալսարանի շրջանավարտ, Գենետիկայի ամբիոնի այցելու պրոֆեսոր, Ավստրիայի Գրացի համալսարանի Բիոբանկի հիմնադիր-տնօրեն, այժմ՝ Ավստրիայի Գրացի համալսարանի ռեկտորատում բոլոր գիտահետազոտական, կրթական ծրագրերի և բոլոր Biobanking և Biomarker Research ծրագրերի պատասխանատու Կարինե Սարգսյանը համաշխարհային տնտեսական ֆորումի Digital Davos 2022 գագաթաժողովի ընթացքում ներկայացրեց «Առողջապահության ապագան» զեկույցը։

Անդրադառնալով հիվանդությանը, որը նա հաղթահարել է և որը հնարավոր եղավ բուժել աշխարհի լավագույն նյարդավիրաբույժներից մեկի շնորհիվ, նա ընդգծեց, որ եթե ծնված լիներ կես դար առաջ, ապա, հնարավոր է, ողջ չլիներ։

«Այս մակարդակի վիրաբուժությունը հասանելի է միայն զարգացած աշխարհում։ Լինելով բժիշկ, հետազոտող և հիվանդ՝ ես բժշկության և առողջապահության ապագան տեսնում եմ ինտեգրացիոն մոտեցման մեջ: Հետագա փոփոխությունները լինելու են երկու տարբեր ոլորտում՝ գործող առողջապահություն և ձևավորվող առողջապահություն», - ընդգծեց Կարինե Սարգսյանը։

Աշխարհում գործող առողջապահություն եռյակն, ըստ մասնագետի, ներառում է՝

• Առողջապահության աշխատողներին՝ բժիշկներ, բուժքույրեր, թերապևտներ,
• Ապագա հիվանդությունները և նոր մարտահրավերները,
• Ապագա ախտորոշիչ և թերապևտիկ տեխնոլոգիաները, որոնք զարգանում են հսկայական արագությամբ։

«Կասկածից վեր է, որ մեր հասարակությունը շատ ավելի արագ է զարգանում, քան նախկինում էր։ Դա վերաբերում է նաև բժշկական տեխնոլոգիաներին, որոնք այսօր հասել են անհավանական մակարդակի», - նշեց Կարինե Սարգսյանը։

Ապագա առողջապահության և բժշկության ձևավորվող եռյակը, զեկույցի համաձայն, վերաբերում է.

• Առողջապահության միտումներին․ «2004 թվականին մենք խոսում էինք անձնավորված բժշկության մասին, իսկ մի քանի տարի առաջ հայտնվեց «ճշգրիտ բժշկություն» տերմինը, և առողջապահությունը սկսեց ավելի շատ հակվել դեպի մեկ անձը: Շատ շուտով սովորական կդառնան կանխարգելիչ ընդլայնման մոտեցումը, թվային առողջապահությունը, ինտեգրված (առօրյա կյանքում) բժշկությունը։ Ապագան այն չէ, թե ինչպես ենք մենք բուժում հիվանդությունները, այլ այն, թե ինչպես ենք կանխում դրանց առաջացումը», - շեշտեց Կարինե Սարգսյանը:
• Առողջապահական համակարգի մարտահրավերներին. «Մենք պետք է պայքարենք հիվանդանոցը որպես բիզնես դիտարկելու գաղափարի դեմ: Պետք է բարձրացնենք մատչելիության մակարդակը: Ապագայում մենք կհաղթահարենք վճարունակության և մատչելիության խոչընդոտը՝ հօգուտ առողջության հասանելիության, համակարգի և լավագույն որակի կայունության, ինտեգրված առողջ հիվանդների փորձի և պարզապես ավելի լավ առողջության», - վստահեցրեց ԵՊԲՀ շրջանավարտը:
• Հնարավորություններին, ինչպիսիք են կարգավորող բարելավումները, բժշկական սիմբիոզի հետազոտությունն ու բուժումը, նոր ինտեգրացիոն կազմակերպչական և բիզնես մոդելները և առողջապահական (տեխնոլոգիական) հարթակները, որոնք, մասնագետի խոսքով, ապագա բժշկությունն ավելի հասանելի կդարձնեն, եթե քաղաքականությունը պահպանի տեխնոլոգիական և բուժիչ զարգացման արագությունը:

«Ապագայում մենք կկարողանանք բուժել վերքերը րոպեների ընթացքում, զարգացնել լիարժեք օրգաններ, ոսկորներ և բջիջներ, ստեղծել մարդկային էներգիայով աշխատող սարքավորումներ, վերականգնել վնասված ուղեղները և շատ ավելին: Ինտեգրատիվ առողջապահությունը, ներթափանցված լինելով մարդկային մոտեցմամբ, ստանալով բարձրակարգ ախտորոշիչ և թերապևտիկ տեխնոլոգիաների աջակցությունը, կլինի հիմնական որոշիչ գործոնը։ Ուստի ապագայում ոչ թե վիրուսը կլինի վարակիչ, այլ ինքնին առողջությունը: Ես ուզում եմ զեկույցս ավարտել Անտուան դը Սենտ Էքզյուպերիի խոսքերով. «Միայն սրտով կարելի է ճիշտ տեսնել. էականն անտեսանելի է աչքի համար»։ Այսպիսով, մենք առողջապահության ոլորտում պետք է առաջնորդվենք սրտով», - եզրափակեց ԵՊԲՀ այցելու պրոֆեսորը:

Հարցեր, պատասխաններ, մեկնաբանություններ