«Էրեբունի» ԲԿ-ի ընդունարանն աշխատում է 7 օր, 24 ժամ. erebunimed.com

«Էրեբունի» ԲԿ-ի ընդունարանն աշխատում է 7 օր, 24 ժամ՝ պլանային և անհետաձգելի կարգով բուժօգնություն ցուցաբերելով օրական ավելի քան 150 հիվանդի: Շտապօգնության մեքենայով կամ ուղղաթիռով ամեն օր ընդունարան է տեղափոխվում 100-ից ավելի հիվանդ: Անհետաձգելի և շտապ բուժօգնություն է ցուցաբերվում տրավմաների, սուր և քրոնիկ բոլոր հիվանդությունների և խնդիրների դեպքում: Ընդունարանի աշխատանքը կազմակերպված է այնպես, որ չկորչեն հիվանդի համար թանկարժեք րոպեները: Առաջին անհրաժեշտ բուժօգնությունը ցուցաբերելու ընթացքում հրավիրվում է նաև նեղ-մասնագետների խումբ, կատարվում է լաբորատոր-գործիքային անհրաժեշտ հետազոտությունները, որից հետո հոսպիտալացման կարիք ունեցող հիվանդները տեղափոխվում են համապատասխան բաժանմունքներ: Ընդունարանը հագեցած է անհետաձգելի բուժօգնություն ցուցաբերելու համար նախատեսված անհրաժեշտ բոլոր սարքավորումներով, որոնք հնարավորություն են տալիս հենց տեղում կազմակերպել համալիր բժշկական օգնություն: Անմիջապես կատարվում են լաբորատոր հետազոտություններ, էլեկտրասրտագրություն (ԷՍԳ), ուլտրաձայնային, ռենտգեն, ինչպես նաև համակարգչային և մագնիսառեզոնանսային տոմոգրաֆիկ հետազոտություններ: Ընդունարանի աշխատանքներում ընդգրկված են բարձր որակավորում ունեցող մասնագետներ, ովքեր կարող են աշխատել արտակարգ պայմաններում՝ հաղթահարելով արտակարգ իրավիճակները: Նրանք աշխատում են շուրջօրյա՝ հատուկ հերթապահությամբ: Տեխնիկական և մասնագիտական լուրջ հնարավորությունները, ինչպես նաև կառավարման հստակ չափորոշիչների կիրառումը հնարավորություն են տալիս «Էրեբունի» ԲԿ ընդունարանում բնակչությանը ցուցաբերել արագ, որակյալ և բազմամասնագիտական բուժօգնություն:

Հարցեր, պատասխաններ, մեկնաբանություններ