ԵՊԲՀ. Համագործակցության հուշագիր՝ ի նպաստ Հայաստանում դեղարտադրության, կրթության և գիտության ոլորտների զարգացման

Երևանի Մխիթար Հերացու անվան պետական բժշկական համալսարանի և Հայաստանում դեղարդյունաբերության առաջատար «Լիկվոր» ընկերության միջև ստորագրվեց համագործակցության հուշագիր:

Համաձայն հուշագրի՝ կողմերը համագործակցելու են մի շարք ուղղություններով, իրենց ջանքերը, ներուժը, միջոցներն ու փորձը մեկտեղելով՝ ի նպաստ Հայաստանում դեղարտադրության, կրթության և գիտության ոլորտների զարգացմանը, երիտասարդ մասնագետների գործնական գիտելիքների ամրապնդման և խորացման, բարձր առաջադիմություն ունեցող շրջանավարտներին աշխատանքով ապահովման և կարիերայի զարգացման հնարավորությունների ստեղծմանը։

«Լիկվոր» ընկերության գործունեության 30-ամյակի միջոցառումներն այսօր մեկնարկեցին՝ R&D (Research and Development) գիտահետազոտական կենտրոնի բացմամբ, որին ներկա էր ԵՊԲՀ ռեկտոր Արմեն Մուրադյանը, Հետբուհական և շարունակական կրթության գծով պրոռեկտոր Գառնիկ Ավետիսյանը,  Դեղագիտության ֆակուլտետի պատասխանատուները:

«Լիկվոր» ընկերությունը հիմնադիր-տնօրեն Սերգեյ Մաթևոսյանի ուղեկցությամբ համալսարանականները ծանոթացան ընկերության  արտադրական հնարավորություններին, որակի վերահսկման ողջ գործընթացին:

«Բժշկական համալսարանը միջազգայնացման գործընթացին համահունչ այսօր ստորագրում է մի հուշագիր, որի շնորհիվ մեր ուսանողները և շրջանավարտները մեր երկրում կարող են տեսնել  եվրոպական ստանդարտներին համապատասխանող պատշաճ արտադրական գործունեությունը՝ GMP-ին կյանքի կոչված:  Հատուկ հպարտություն է առաջացնում, որ հայ և օտարերկրացի ուսանողները, որոնք ցանկություն են հայտնել Հայաստանում բժշկական կրթություն ստանալ կարող են տեսնել աշխարհի մակարդակով ինովացիոն արտադրություն, գործարան և գիտահետազոտական կենտրոն»-ասաց ԵՊԲՀ ռեկտոր Արմեն Մուրադյանը՝ կարևորելով գիտական, կրթական ուղղություներով համագործակցության ընդլայնման ուղղած համատեղ ծրագրերի իրականացումը:

«Գործունեության 30 տարվա պատմության ընթացքում մեր առաքելության կարևոր կետերից մեկը եղել է Հայաստանում դեղարտադրության ոլորտի զարգացումը: Լավ գիտակցելով, որ այդ գործում իր կարևոր դերն ունի թիմը, մենք մշտապես տարբեր ծրագրերով ու նախաձեռնություններով աջակցել ենք կադրերի աճին, հմտությունների կատարելագործմանն ու նրանց մրցունակ և պահանջված մասնագետ դառնալուն: «Լիկվոր»- ի և ԵՊԲՀ-ի միջև հուշագրով  ընկերությունում ստեղծելու ենք ուսումնական հարթակ և ԵՊԲՀ դեղագիտական ֆակուլտետի ուսանողներին, որպես ուսումնական ծրագրի մաս, հատկացվելու են հատուկ դասաժամեր՝ պատշաճ արտադրական և պատշաճ լաբորատոր գործունեության (GMP, GLP) ուսումնասիրման նպատակով»,-նշեց «Լիկվոր» ընկերության հիմնադիր, գլխավոր տնօրեն Սերգեյ Մաթևոսյանը՝ հավելելով, որ ԵՊԲՀ-ի հետ մեկնարկող համագործակցությունն ուղղված է երիտասարդ մասնագետների արտադրության գործընթացքում ներգրավելուն:

Նշենք, որ  «Լիկվոր»-ը հիմնադրման 30-ամյակի առթիվ նաև սահմանել է «Ակադեմիկոս Էմիլ Գաբրիելյանի անվան» կթաթոշակ որը ԵՊԲՀ-ի հետ համագործակցության շրջանակում տրամադրելու է Դեղագիտական ֆակուլտետի բակալավրիատի վերջին կուրսի՝ առավել բարձր առաջադիմություն ունեցող ուսանողին՝ 2021թ.-2022թ. ուսումնական տարում մագիստրատուրայում սովորելու ընթացքում: Իսկ «Մաթևոսյան Զարգացման հիմնադրամի» կողմից, Դեղագիտական ֆակուլտետի մագիստրատուրա ընդունված, բարձր առաջադիմություն ունեցող ևս 3 ուսանող կստանան 2021թ.-2022թ. ուսումնական տարվա ուսման վճարի 50%-ի չափով փոխհատուցում:

Ստորագրված հուշագրի, համագործակցության շրջանակում խոշոր այս դեղարդյունաբերական ընկերությունում  նախատեսվում են ստերիլ դեղերի արտադրության վերաբերյալ ուսումնական և արտադրական պրակտիկաներ, որոնց ընթացքում ուսանողները հնարավորություն կունենան ծանոթանալ արտադրության գործընթացին, սկզբունքներին ու առանձնահատկություններին, ինչպես նաև R&D կենտրոնի աշխատանքին, որտեղ իրականացվելու են կենսատեխնոլոգիաների ոլորտի ուսումնասիրություններ և գիտական հետազոտություններ՝ դեղարտադրության կատարելագործման, նորագույն բարձր տեխնոլոգիաների ներդրման, նորարար  և արդյունավետ լուծումների միջոցով որակյալ և թերապևտիկ բարձր արդյունավետություն ունեցող արտադրանք ստեղծելու նպատակով:

Հարցեր, պատասխաններ, մեկնաբանություններ