Կլինիկական դեպք. աորտայի անևրիզման գոտկային ցավի պատճառ, Օֆելիա Ավետիսյան. armeniamedicalcenter.am

65 տարեկան տղամարդը բավականին երկար ժամանակ պարբերաբար հսկվել էր նյարդաբանի և անոթաբանի կողմից: Վերջին անգամ անոթների  հետազոտություն կատարվել էր մոտավորապես մեկ տարի առաջ, որի արդյունքում ժխտվել էր անոթային որևէ ախտաբանություն:

Տղամարդը դիմել է «Արմենիա» ԲԿ` ողնաշարի ցավի կապակցությամբ: Նա գանգատվում էր մեջքի շրջանի ցավից` հատկապես գոտկա-սրբանային հատվածի , որը խանգարում էր նաև նրա քայլքին : Նախքան մեզ դիմելը, 2 շաբաթ առաջ խորհրդակցել էր նյարդաբանի հետ, կատարվել էր գոտկա-սրբանային հատվածի ՄՌՇ , և որևէ լուրջ խնդիր չի հայտնաբերվել: Նշանակվել էր ախտանշային դեղորայքային բուժում:

«Արմենիա» ԲԿ-ում կատարվեցին համապատասխան միջոցառումներ: Ախտանշային բուժման ֆոնի վրա դրական փոփոխություններ չարձանագրվեցին, ինչպես նախկինում ստացած թե՛ նյարդաբանական և թե՛ ֆիզիոթերապևտիկ բուժումները դրական արդյունք չէին տվել:

Բուժման դրական դինամիկայի բացակայությունը ստիպեց մտածել այլ ախտաբանության մասին և իրականացվեցին նաև այլ հետազոտություններ: ՄՌՇ-ի ժամանակ ախտաբանական փոփոխություններ նկատվեցին որովայնային աորտայում:

Իրականացված հետազոտությունների արդյունքում պարզվեց, որ ցավերի պատճառ է աորտայի ախտաբանությունը , ինչը հաստատեց անոթային վիրաբույժը: Իրականացվեց որովայնային աորտայի և ստորին վերջույթների ՀՇ-անգիոգրաֆիա: Արդյունքում ախտորոշվեց որովայնային աորտայի անևրիզմա` բավականին մեծ չափերի:

Հիվանդին առաջարկվեց վիրահատական բուժում: Վիրահատությունը բարեհաջող ընթացավ, ցավերն ամբողջովին անցան:

Այսպիսով, ողնաշարային ցավային համախտանիշը ոչ թե հետևանք էր ողնաշարում առկա խնդիրների, այլ աորտայի ախտաբանության:
 
Ավետիսյան Օֆելիա Արտուշի, բժիշկ- նյարդաբան

Հարցեր, պատասխաններ, մեկնաբանություններ