ԼՂՀ ԱՆ. Առողջապահության համակարգում տոն է: Սպասելիքն` իրականություն

Դեկտեմբերի 16-ին հանդիսավորությամբ բացվել է Արցախ Բունիաթյանի անվան Քաշաթաղի շրջանային բուժմիավորման նորակառույց շենքը:
Բացման արարողությանը մասնակցել են Արցախի Հանրապետության նախագահ Բակո Սահակյանը, պետական նախարար Գրիգորի Մարտիրոսյանը, առողջապահության նախարար Արայիկ Բաղրյանն ու պաշտոնատար այլ անձիք:

Բուժմիավորման բակում ԼՂՀ վաստակավոր բժիշկ, վիրաբույժ Արցախ Բունիաթյանի կիսանդրու բացման արարողությանը, որի պատիվը տրվել է բժշկի ընտանիքի անդամներին`հաջորդել է բուժմիավորման շենքի բացման տոնական արարողությունը:

ԱՀ առողջապահության նախարար Արայիկ Բաղրյանը ելույթում նշել է, որ այսօր մասնակիցն ենք առողջապահության ոլորտի շատ պահանջված բուժհիմնարկի բացման արարողությանը, որը համալրված է նորագույն` վերջին սերնդի բուժսարքավորումներով ու անհրաժեշտ գույքով։ Քաշաթաղի շրջանային բուժմիավորման նորակառույց շենքը մեծ նվեր է ինչպես շրջանի բնակչությանը, այնպես էլ առողջապահության համակարգին:

Բուժմիավորման գործադիր տնօրեն Կարեն Գրիգորյանը երախտագիտություն է հայտնել բոլոր նրանց` ում անմիջական աջակցությամբ քաշաթաղցիների երկար տարիների երազանքը իրականություն է դարձել:

Նորակառույց հիվանդանոցի շենքի կարմիր ժապավենի կտրման պատիվը տրվել է բժիշկ Բունիաթյանի թոռանը և Քաշաթաղի բազմազավակ ընտանիքի երեխայի:

Շենքի ներսում օրհնության կարգ է մատուցել Քաշաթաղի շրջանի հոգևոր հովիվ Տեր Բենիամին քահանա Ծատուրյանը:

Այնուհետև Հանրապետության նախագահը ու միջոցառման մասնակիցները ծանոթացել են բուժհիմնարկի պայմաններին և հագեցվածությանը:

Նշենք, որ բուժմիավորումում կգործեն ծննդաբերական, մանկական, վիրաբուժական, թերապևտիկ, ռենտգեն, շտապ օգնության բաժանմունքներ և լաբորատորիա:

Հարցեր, պատասխաններ, մեկնաբանություններ