ՀՀ ԱՆ. «Քանաքեռ-Զեյթուն» բժշկական կենտրոնի ակնաբույժները Արցախում անվճար վիրահատություններ են իրականացրել

Արցախի Հանրապետության առողջապահության նախարարության հրավերով կրկին Ստեփանակերտ էին ժամանել Երևանի «Քանաքեռ-Զեյթուն» բժշկական կենտրոնի ակնաբույժները՝ տնօրեն Հայկ Պետրոսյանի գլխավորությամբ:

«Քանաքեռ-Զեյթուն» բժշկական կենտրոնի ակնաբուժական կլինիկայի վնասվածքաբանության բաժանմունքի վարիչ, բժշկական գիտությունների թեկնածու Տիգրան Դովլաթյանը, անոթային բաժանմունքի վարիչ, ակնաբույժ Գևորգ Բարաղամյանը և վիրահատական բլոկի պատասխանատու Անդրե Ամիրխանյանը նոյեմբերի 10-11-ը Հանրապետական բժշկական կենտրոնում Արցախի մասնագետների հետ համատեղ իրականացրել են անվճար խորհրդատվություններ և վիրահատություններ:
 

Ակնաբույժների կողմից կատարվել է 9 վիրահատություն, հիմնականում կատարակտաներ՝ նորագույն ֆակոէմուլսիֆիկացիոն մեթոդով:
 

Ֆակոէմուլսիֆիկացիան ուլտրաձայնային վիրահատություն է՝ շատ փոքր կտրվածքով ոսպնյակի հեռացմամբ և ներակնային արհեստական ոսպնյակի տեղադրմամբ: Այդպիսի կտրվածքը չի պահանջում կարերով հերմետիզացում, կրճատում է հետվիրահատական վերականգնման ժամկետները և թույլ է տալիս խուսափել մի շարք բարդություններից:
  

Հիվանդները գրանցվել էին նախապես անցկացված խորհրդատվությունների միջոցով և ընտրվել բարդ վիրահատությունների կարիք ունեցողները:
  

Հարկ է նկատել, որ վերոնշյալ վիրահատություններն ամբողջությամբ անվճար են իրականացվել: Վիրահատական միջամտության համար անհրաժեշտ ոսպնյակները բարեգործական հիմունքներով տրամադրվել են «Քանաքեռ-Զեյթուն» բժշկական կենտրոնի կողմից:
  

Երևանից ժամանած ակնաբույժները իրենց գոհունակությունն են արտահայտել Արցախի մասնագետների վերաբերյալ և հավելել, որ նմանատիպ այցելությունները շարունակական բնույթ են կրելու:

Հարցեր, պատասխաններ, մեկնաբանություններ