Վերականգնվեց էլեկտրական սղոցով վնասված ձեռքի մատների աշխատանքը. Արա Մելիքսեթյան. armeniamedicalcenter.am

Շտապ օգնության կանչով, անհետաձգելի ցուցումներով, Արմենիա ՀԲԿ ընդունվեց 57 տարեկան պացիենտ: Տղամարդը էլեկտրական սղոցով ձեռքի մատների հիմքերից պատռված վերք էր ստացել: Առաջացել էր երկրորդ մատի ոչ լրիվ տրավմատիկ ամպուտացիա, չորրորդ մատի բաց բազմաբեկորային կոտրվածք` միջնային ֆալանգի բաց բազմաբերկորային կոտրվածք` բեկորների տեղաշարժով, երրորդ և հինգերորդ մատների ափային մակերեսների պատռված վերքեր, նյարդանոթային խրձերի և ծալի ջղերի վնասումներ: Մատների արյունամատակարարումը դեկոմպենսացված էր, այսինքն` արյան շրջանառությունը խանգարված էր զարկերակների ամբողջականության վնասվածության պատճառով:

Շտապ կարգով և անհետաձգելի ցուցումներով հիվանդը վիրահատվեց: Կատարվել է երկրորդ մատի հիմնային ֆալանգի օստեոսինթեզ.  ոսկրը ֆիքսվել է մետաղական շյուղով, այնուհետև` հինգերորդ մատի միջնային ֆալանգի օստեոսինթեզ. այստեղ կար նաև ոսկրային դեֆեկտ, որը նույնպես վերականգնվել է: Հաջորդիվ վերականգվել են ծալի ջղերը, կարվել են մատների նյարդերը` 8 նյարդ (յուրաքանչյուր մատ ունի 2 նյարդ) և վերականգնվել են մատային զարկերակները: Մատային զարկերակները բավականին բարակ են, մոտավորապես 1 մմ տրամագիծ ունեն: Այս ամենը կատարվել է օպտիկական խոշորացման տակ` մոտավորապես 4-5 անգամ. առանց միկրոսկոպի հնարավոր չէր իրականացնել նման վիրահատություն:

Մատների արյունամատակարարումը վերականգվել է վիրահատության ընթացքում. մատները տաքացան, դարձան վարդագույն, մազանոթային խաղը եղունգային մահիճի վրա տեսանելի դարձավ:

Վիրահատությունը տևել է 10.5 ժամ, հետվիրահատական շրջանն անցել է հարթ, վերքերը հիմնականում վերականգվել են, բացառությամբ 5-րդ մատի, քանի որ վերականգնումը բացառվում էր: Վիրահատությունից անցել է երեք շաբաթ, ճկույթի վերքը նույնպես լավացել է: Հիվանդն ընդունել է հակաբիոտիկներ, ինֆուզիոն թերապիա և դուրս է գրվել: Ներկայում գտնվում է հսկողության`ամբուլատոր բուժման գործընթացում: 2-3 շաբաթ անց կիրականացվի կրկնակի ռենտգեն հետազոտություն` պարզելու ոսկրերի վերականգնման գործընթացը: Այնուհետև կհեռացվեն մետաղական շյուղերը և կհաջորդի վերականգնողական բուժումը` հնարավոր է ֆիզիոթերապիայի, բուժական ֆիզկուլտուրայի կամ բուժական մերսման անհրաժեշտություն լինի:

Հարցեր, պատասխաններ, մեկնաբանություններ