ԼՂՀ ԱՆ. Ստեփանակերտում նորագույն տեխնոլոգիաներով անվճար անոթային վիրահատություններ են իրականացվել

Ավստրիայում հայտնի, մեր հայրենակից անոթային վիրաբույժ Արա Ուղուրլյանի գլխավորած պատվիրակությունը Զալցուրգից Արցախ էր ժամանել: Ստեփանակերտի Հանրապետական բժշկական կենտրոնում դեկտեմբերի 6-9-ը բժիշկ Արա Ուղուրլյանը իր գործընկերոջ` պրոֆեսոր Թոմաս Հոլցենբայնի հետ կատարել են անոթային տարբեր տիպի 15 վիրահատություններ, որոնցից 11-ը` էնդովասկուլյար, իսկ` 4-ը բաց եղանակով:

Նշենք, որ բժիշկներն իրենց հետ բերել էին վիրահատական միջամտությունների համար անհրաժեշտ բոլոր բժշկական պարագները:

Փորձառու մասնագտեները նախապես անցկացրել են ավելի քան 50 հիվանդի խորհրդատվություն, որոնցից ընտրել են վիրահատության կարիք ունեցողները:

Բոլոր վիրահատություններն ամբողջությամբ անվճար են իրականացվել:

Նմանատիպ վիրահատություններ առաջին անգամ է կատարվել Արցախում, ընդ որում տեղի մասնագետների հետ համատեղ:

Կատարված վիրահատությունների գերակշիռ մասն իրականացվել է Հանրապետական բժշկական կենտրոնի անգիոգրաֆիայի կենտրոնում տեղադրված սարքի միջոցով: Գերմանական «Սիմենս» ընկերության վերջին սերնդի անգիոգրաֆը մինչ այժմ օգտագործվում էր միայն սրտի կորոնար անոթների ախտարոշման և ստենտավորման համար: Ավստիայից ժամանած բժիշկներն առաջին անգամ անգիոգրաֆի միջոցով կատարել են ներանոթային այլ միջամտություններ:

Ավստրիահայ անոթաբան Արա Ուղուրլյանը նշել է, իրենց այցի նպատակը արցախցի գործընկերներին անոթաբանության բնագավառում փորձի փոխանակումն է: Այս նախադեպն Արցախում ինքնուրույն վիրահատություններ իրականացնելու լավ սկիզբ է:

Հարցեր, պատասխաններ, մեկնաբանություններ