Արցախում քաղցկեղով հիվանդների թիվը ցածր է միջազգայնորեն ընդունված նորմերից

Ըստ քանակի` առաջին տեղում են կրծքագեղձի, երկրորդում՝ թոքերի, երրորդ և չորրորդ տեղերը կիսում են մաշկի և ստամոքսի քաղցկեղով հիվանդները:

Այսօր ԼՂՀ կառավարության նիստերի դահլիճում կայացավ առողջապահության նախարարությանը կից կոլեգիայի նիստ, որին ներկա էին նաև ԼՂՀ առողջապահության նախարար Հարություն Քուշկյանը, ԼՂՀ ոստիկանության պետ Կամո Աղաջանյանը, Ազգային ժողովի առողջապահության և սոցիալական հարցերի հանձնաժողովի նախագահ Արամ Գրիգորյանը, բժիշկներ՝ մայրաքաղաքից և շրջաններից:

«Արցախպրես»-ի հաղորդմամբ, Կոլեգիայի նիստում «ԼՂՀ-ում ուռուցքաբանական ծառայության արդի վիճակը և նրա բարելավման հետագա ուղությունները» թեմայով զեկուցմամբ հանդես եկավ «Ուռուցքաբանական դիսպանսեր»-ի գործադիր տնօրեն՝ Արմեն Հայրիյանը:

Գլխավոր ուռուցքաբանի խոսքով, դիսպանսերը կազմված է ստացիոնար և ամբուլատոր բաժանմունքներից, որտեղ հունվարի 1-ի դրությամբ հաշվառած են 1620 հիվանդներ, որոնցից 780-ը` Ստեփանակերտ քաղաքից, 234-ը՝ Մարտակերտի, 253-ը՝ Մարտունու, 165-ը՝ Ասկերանի, 107-ը՝ Հադրութի,  36-ը՝ Քաշաթաղի, 34-ը՝ Շուշիի և 11-ը Շահումյանի շրջաններից:

Ըստ քանակի` առաջին տեղում են կրծքագեղձի, երկրորդում՝ թոքերի, երրորդ և չորրորդ տեղերը կիսում են մաշկի և ստամոքսի քաղցկեղով հիվանդները:

Ա. Հայրիյանի տեղեկացմամբ, 1000 մարդու հաշվով Արցախում արձանագրված քաղցկեղով հիվանդների թիվը, ՀՀ-ի հետ համեմատ, գտնվում է համարյա նույն մակարդակի վրա, որը միջազգային հաստատված նորմերով ցածր ցուցանիշ է համարվում։ Հիվանդների 50 և ավելի տոկոսն, ըստ զեկուցողի, հիվանդացել են 65 և բարձր տարիքում և բարեբախտաբար հիվանդացության երիտասարդացման միտում առանձնապես չի նկատվում:

Ամփոփիչ խոսքում Հ. Քուշկյանը, շնորհավորելով բուժաշխատողներին գալիք մասնագիտական օրվա կապակցությամբ, ընդգծեց բուժաշխատողների կողմից առավելագույն հնարավորությունների ներդրման կարևորությունն՝ Արցախում առողջապահության ոլորտի խնդիրների լուծման առումով:

Հարցեր, պատասխաններ, մեկնաբանություններ