Վիրահատած քթով հորից ու մորից, միևնույն է, մեծ քթով երեխա է ծնվում. Պլաստիկ վիրաբույժ

Քանաքեռ-Զեյթուն բժշկական կենտրոնում պլաստիկ վիրահատությունները տարեկան մինչև հազարի են հասնում: Մարդիկ հիմնականում դիմում են լինոպլաստիկայի` քթի փոքրացման համար: Այսօր պլաստիկ վիրաբուժության թեմայով 3-րդ միջազգային համաժողովի շրջանակներում լրագրողների հետ հանդիպմանն ասաց նույն կենտրոնի տնօրեն, բժիշկ Գագիկ Ստամբոլցյանը: Ըստ նրա, վիրահատվող մարդկանց թվի առումով մյուս բժշկական կենտրոնները նույնպես չեն զիջում: «Երևի Աստված չի խնայել մեզ քթերի առումով, եթե հորն ու մորը վիրահատում ենք, քիթը նորմալ է, երեխան, միևնույն է, ծնվում է նույն մեծ քթով: Այդ պրոբլեմը մենք ունենք»,- հումորով նկատեց նա:

Բժշկի խոսքով, քթի վիրահատությունից բացի վերջին 10 տարում շատացել են նաև փորի առաջային պատի կախվածության վիրահատությունները, որոնք հիմնականում հետծննդյան շրջանում են լինում, իսկ կրծքագեղձի պլաստիկ վիրահատությունների թիվն այնքան էլ մեծ չէ:
Հայաստանում պլաստիկ վիրահատության դիմողների գրպանում պետք է լինի առնվազն 200-600 հազար դրամ: Ընդ որում, կան վիրահատություններ, օրինակ կրծքագեղձի լիպոսակցիան` ճարպի ներարկումը, որոնք մի քանի անգամ կրկնելու կարիք ունեն: Առաջին վիրահատությունից հետո ներարկված ճարպի 60 տոկոսը սովորաբար ներծծվում է, հետևաբար կարիք կա 2-րդ, 3-րդ, երբեմն նաև այլ վիրահատությունների:

Ինչ վերաբերում է միաժամանակյա մի քանի վիրահատություններին, բժիշկն ասաց, որ ցանկալի չէ, քանի որ, օրինակ, նույն 6-7 լիտր հեռացված ճարպից բացի հեռանում են նաև օրգանիզմի համար օգտակար արյան էլեմենտներ, էլեկտրոլիդներ և այլն:

«Եթե 5 ամիս հետո, ևս մեկ անգամ, նույն մարդը ցանկանա վիրահատվել, կհետազոտվի, եթե բոլոր տվյալները բավարար են, կրկին կարող է վիրահատվել»,- ասաց նա:

Հարցեր, պատասխաններ, մեկնաբանություններ