19 մլն ԱՄՆ դոլար` առողջապահական համակարգի արդիականացման համար

Համաշխարհային բանկը 19 մլն ԱՄՆ դոլար կտրամադրի «Հայաստանի առողջապահական համակարգի արդիականացման» ծրագրի երկրորդ փուլի լրացուցիչ ֆինանսավորման համար: Այդ մասին որոշում կայացվել է դեկտեմբերի 21-ին կայացած ՀԲ գործադիր տնօրենների խորհրդի նիստում:

Ինչպես տեղեկացնում են ՀԲ լրատվական ծառայությունից, ծրագիրը կօժանդակի Հայաստանի կառավարության ջանքերին` ուղղված ընտանեկան բժշկության հիման վրա առաջնային բուժօգնության ծառայությունների ընդլայնմանը և մարզերում հիվանդանոցային ցանցի արդիականացմանը: Ծրագրի նպատակն է բնակչությանը, մասնավորապես` ամենախոցելի խմբերին, տրամադրել առավել մատչելի, որակյալ առողջապահական ծառայություններ, ինչպես նաև ավելի լավ կառավարել հանրային առողջապահության սպառնալիքները:

Մասնավորապես, այս ծրագրով, կնորացվեն ևս 14 գյուղական ամբուլատորիաների ֆիզիկական պայմանները, կտրամադրվեն ժամանակակից սարքավորումներ, և բժշկական անձնակազմը կվերապատրաստվի (ընտանեկան բժիշկներ և ընտանեկան բուժքույրեր) ընտանեկան բժշկության ուղղությամբ: Ինչպես նաև կֆինանսավորվի Արարատի, Արմավիրի, Ապարանի և Գորիսի չորս մարզային հիվանդանոցների համար սարքավորումների, պարագաների և կահույքի ձեռքբերումը, լիարժեք կվերազինվեն Գավառի և Գյումրիի բժշկական կենտրոնները, կֆինանսավորվի Գյումրիում նոր հիվանդանոցի շենքի կառուցումը:

Իսկ Մեղրիի և Կապանի, Աբովյանի, Ալավերդու և Վանաձորի և Բերդի մարզային հիվանդանոցային ցանցերը ժամանակակից տեխնոլոգիաներով կվերազինվեն:

Համաշխարհային բանկի ծրագրի շրջանակում ուսուցանվել է 1200 ընտանեկան բժիշկ և 1300-ից ավելի ընտանեկան բուժքույր: Հայաստանի 79 համայնքներում կառուցվել են նոր ամբուլատորիաներ: 66 համայնքում ամբուլատորիաները հիմնանորոգվել են: Բոլոր 255 ամբուլատորիաները և բժշկական կենտրոնները ստացել են նոր բժշկական սարքավորումներ, կահույք և այլ անհրաժեշտ պարագաներ:

Ծրագրի ընդհանուր ֆինանսավորումը 25.3 միլիոն ԱՄՆ դոլար է, որից`6.3 միլիոն դոլարը Հայաստանի կառավարությունը ֆինանսավորելու է սեփական միջոցների հաշվին: ՎԶՄԲ 19 միլիոն ԱՄՆ դոլար գումարով վարկն ունի 25 տարվա մարման ժամկետ, այդ թվում` 10 տարվա արտոնյալ ժամկետ:

1992 թվականին Համաշխարհային բանկին և 1993 թվականին ՄԶԸ-ին անդամակցելուց հետո, Հայաստանին տրամադրվել է մոտավորապես 1.409 միլիարդ ԱՄՆ դոլար:

Հարցեր, պատասխաններ, մեկնաբանություններ