ՀՀ 2011թ. բյուջեով առողջապահությանը հատկացվող գումարը կկազմի մոտ 64 մլրդ դրամ՝ 2010թ. 54 մլրդ դրամի փոխարեն։ Այս մասին այսօր լրագրողներին տեղեկացրեց ՀՀ ԱԺ Առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը։

Նրա խոսքով՝ նախորդ տարվա համեմատ առողջապահության ոլորտի հատկացումներն աճել են շուրջ 14 տոկոսով։

«Երկու տարի շարունակ պետությունը ջանքեր է գործադրում, որպեսզի մայրության, հղիության և ծննդօգնության հետ կապված բուժօգնությունը լինի բացառապես անվճար»,– ասաց նա։

Բաբլոյանը տեղեկացրեց նաև, որ 2011թ. պետբյուջեով մինչև 7 տարեկան երեխաների բուժօգնության ծառայությունների մատուցման մասով հատկացումներն ավելանում են երկու անգամ։

«Դա արվում է այն նպատակով, որպեսզի մինչև 7 տարեկան երեխաներին մատուցվող բուժծառայությունները լինեն բացառապես անվճար», – ասաց նա։