Մասնագետ. «Արհեստական բեղմնավորման գներն առաջիկա 20 տարիներին նույնպես մատչելի չեն լինի»

Եվրոպական հարուստ երկրներում էլ արհեստական բեղմնավորման կարիք ունեցող բոլոր զույգերի 20 տոկոսն է միայն կարողանում օգտվել այդ ծառայությունից, իսկ Հայաստանում սա լուրջ խնդիր է: Այս մասին այսօրվա ասուլիսում ասաց Մարդու վերարտադրության կենտրոնի տնօրեն, «Հայաստանի վերարտադրողական բժշկության» ասոցիացիայի նախագահ Էդուարդ Համբարձումյանը:

Ասոցիացիայի նախագահը նշեց, որ Հայաստանի նման աղքատ համարվող երկրներում արհեստական բեղմնավորման մատչելիության ու բոլորին հասանելիության հարցը շուտ չի լուծվի: «Առաջիկա 20 տարիներին նույնպես արհեստական բեղմնավորման գները Հայաստանում բոլոր ցանկացողների համար մատչելի չեն լինի: Դրա համար հարկավոր է ավելի շատ մտածել այն հիվանդությունները կանխարգելելու մասին, որոնց պատճառով անպտղություն է առաջանում»,-ասաց Է. Համբարձումյանը:

Ինչպես նշեց մասնագետը, առաջին հերթին անպտղության առաջացմանը նպաստում են վարակները: Իսկ ասուլիսի մյուս բանախոսը, առողջապահության նախարարության բուժօգնության կազմակերպման վարչության Մոր և մանկան առողջության պահպանման բաժնի գլխավոր մասնագետ Գայանե Ավագյանը նշեց, որ վերարտադրողական թանկարժեք օժանդակ տեխնոլոգիաները չեն մտնում պետպատվերի ցանկ, սակայն նկատեց, որ նպատակ կա հետագայում այդ խնդիրը լուծել: ԱՆ գլխավոր մասնագետը հիշեցրեց, որ տարածքային պոլիկլինիկաներում բուժօգնությունն անվճար է` իրականացվում է պետպատվերի շրջանակներում: «Հղիների և հետծննդյան շրջանում գտնվող կանանց համար բուժօգնության մատչելիությունը նույնպես ապահովված է»,- եզրափակեց Գ. Ավագյանը:

Հարցեր, պատասխաններ, մեկնաբանություններ