Առողջապահության ոլորտում նկատելի են դրական տեղաշարժեր

Առողջապահության ազգային ինստիտուտում երեկ կայացավ Հայաստանի «Առողջապահության կազմակերպիչների միավորում» հասարակական կազմակերպության հերթական՝ 3—րդ համագումարը։ Կազմակերպությունը միավորում է շուրջ 21 հազար բուժաշխատողների։

ՀՀ առողջապահության նախարար Հարություն Քուշկյանի խոսքով՝ կազմակերպությունը մեծ դերակատարություն ունի առողջապահության ոլորտի զարգացման բնագավառում՝ իրականացնելով այնպիսի քայլեր, որոնք ծառայում են ժողովրդի առողջության բարելավմանը։

Առողջապահության ոլորտում իրականացվող բարեփոխումները աստիճանաբար տալիս են դրական արդյունքեր։ Դրական տեղաշարժերից Հ. Քուշկյանն առանձնացրեց այն հանգամանքը, որ կազմակերպության գործունեության շնորհիվ 2007 թվականի ընթացքում առողջապահական համակարգի ունեցած 6 մլրդ 600 մլն դրամ կրեդիտորական պարտքն այսօր կազմում է 500 մլն դրամ, որը համարվում է ոչ վտանգավոր, աշխատանքային ընթացիկ պարտք։ Կազմակերպության գործադիր տնօրեն Սմբատ Դաղբաշյանը նշեց, որ կազմակերպությունը ոչ միայն ուշադրություն է դարձրել առողջապահության ոլորտում գոյություն ունեցող խնդիրներին եւ դրանց լուծմանը, այլեւ զբաղվել է ակտիվ հասարակական գործունեությամբ՝ արձագանքելով հասարակական հնչեղություն ունեցող բոլոր հարցադրումներին եւ արդյունավետ գործունեություն ծավալելով թե Երեւանում, թե մարզերում։

Համագումարը Հարություն Քուշկյանին ընտրեց «Առողջապահության կազմակերպիչների միավորում» հասարակական կազմակերպության պատվավոր նախագահ։ Վերընտրվեցին կազմակերպության համանախագահներ Դերենիկ Դումանյանը, Արա Մինասյանը եւ Արա Բաբլոյանը, ինչպես նաեւ խորհրդի 47 անդամները։

Հարցեր, պատասխաններ, մեկնաբանություններ