Ապրիլի 6-ը՝ Սպորտի միջազգային օր՝ զարգացման և խաղաղության համար

2013թ. օգոստոսի 23-ին ՄԱԿ-ի գլխավոր վեհաժողովը (ասամբլեան) ապրիլի 6-ը որպես Սպորտի միջազգային օր նշելու միաձայն որոշում ընդունեց: Օրվա պաշտոնական անվանումը` Սպորտի միջազգային օր՝ զարգացման և խաղաղության համար (International Day of Sport for Development and Peace):

Նախագծի հովանավորների թվին դասվեցին Բելառուսը, Վրաստանը, Ղազախստանը, Ռումինիան, Ռուսաստանը, Սերբիան ու Մակեդոնիան: Որոշման մեջ նշված է, որ ՄԱԿ համակարգի շրջանակներում իրականացվող բոլոր ծախսերի ֆինանսավորումը կկատարվի համաշխարհային հանրության կամավոր անդամների ներդրման հաշվին:

Գլխավոր վեհաժողովի (ասամբլեայի) նիստին ներկա էին Միջազգային օլիմպիական կոմիտեի նախագահ Ժակ Ռոգգեն և «Աշխարհի առաջին ռակետ» Նովակ Ջոկովիչը: Որոշումը ընդունելու առիթով Ժակ Ռոգգեն իր ելույթի ժամանակ նշեց, որ սպորտի ոլորտում ՄՕԿ-ի և ՄԱԿ-ի համագործակցությունը վաղուց ավանդույթ է դարձել: Սկիզբը դրվեց 1952թ., երբ ՅՈՒՆԵՍԿՈ-ն սպորտը՝ որպես կրթության միջոց, զարգացնելու առաջին քարոզարշավն անցկացրեց:

Սերբ Նովակ Ջոկովիչն իր կողմից ներկաներին հիշեցրեց, որ ինքը ծնվել և մեծացել է փոքր երկրում, բայց սպորտի շնորհիվ իրեն հաջողվել է մեծ հաջողությունների հասնել ու աշխարհի շատ երկրներում լինել:  Ջոկովիչը ավելացրել է, որ սպորտը բնավորության ամրացման ամենալավ միջոցն է:

«Ես հույս ունեմ, որ Սպորտի միջազգային օրվա հաստատումը մեզանից յուրաքանչյուրի համար մեր ջանքերը կենտրոնացնելու և սպորտի հիմնական արժեքների (ինչպիսիք են՝ արդար խաղը, թիմում համաձայնեցվածությունը և մրցակցի հանդեպ հարգանքը) զարգացման խթան կդառնա: Սրանք համընդհանուր որակ են»,- ասել է թենիսիստը:

Սպորտը, լինելով կրթության, զարգացման և խաղաղության գործիքներից մեկը, նպաստում է համագործակցության, համերաշխության, հանդուրժողականության, փոխըմբռման և սոցիալական ներգրավման ամրապնդմանը տեղական, ազգային և միջազգային մակարդակներով: Այս պատճառով էլ Միավորված Ազգերի Կազմակերպությունն առաջարկում է բոլոր երկրներին, ՄԱԿ կազմակերպություններին (առաջին հերթին Միավորված Ազգերի Կազմակերպության Զարգացման և խաղաղության համար սպորտի գրասենյակին), ինչպես նաև միջազգային, տարածաշրջանային և ազգային մարզական կազմակերպություններին, քաղաքացիական հասարակությանը՝ հասարակական և մասնավոր կազմակերպությունները ներառյալ, և բոլոր այլ հետաքրքրված կողմերին,  նշել Սպորտի միջազգային օրը և նպաստել դրա վերաբերյալ տեղեկացվածության բարձրացմանը:

Հիմնադիրների մտահաղացման համաձայն, Սպորտի միջազգային օրն ամեն տարի հունիսի 23-ին նշվող Օլիմպիական խաղերի միջազգային օրվա հաջող լրացումը կդառնա: Սպորտի օրն ամբողջ աշխարհում միլիոնավոր մարդիկ կմասնակցեն սպորտային մրցումների ՝ սկսած 10 կիլոմետրանոց վազքից և մարաթոններից, կլինեն նաև խմբային սպորտային խաղեր, հեծանվավազքեր և կրթական միջոցառումներ: 

Հարցեր, պատասխաններ, մեկնաբանություններ