1859 թ. վաճառքում հայտնվեց Չարլզ Դարվինի «Տեսակների ծագումը » աշխատությունը

Լոնդոնի գրախանութներում 1859 թ. նոյեմբերի 23-ին վաճառքում հայտնվեց Չարլզ Դարվինի գրքի կանաչ հատորյակը՝ «Տեսակների ծագումը Բնական ընտրության ճանապարհով, կամ կյանքի համար պայքարում բարենպաստ ցեղերի գոյատևումը», որտեղ որպես էվոլյուցիայի հիմնական շարժիչ ուժ Դարվինը նշել է բնական ընտրությունը և անորոշ փոփոխականությունը:

Այն ժամանակների համար հսկայական քանակությամբ՝ 1250 օրինակ գիրք գնվեց մեկ օրում, որով համաշխարհային գիտության մեջ հայտնվեց կենդանական աշխարհի էվոլյուցիայի տեսությունը, ինչը ժամանակակից կենսաբանության կամ դարվինիզմի հիմնաքարը դարձավ:
Չարլզ Ռոբերտ Դարվինը (1809-1882) անգլիացի բնագետ է, նատուրալիստ և ճանապարհորդ, Պետերբուրգի գիտությունների ակադեմիայի օտարերկյա թղթակից անդամ:

Ընդհանրացնելով իր սեփական դիտարկումների տվյալներն ու իր ժամանակվա կենսաբանության և սելեկցիոն պրակտիկայի ձեռքբերումները՝ նա բացահայտեց օրգանական աշխարհի էվոլյուցիայի հիմնական գործոնները:

Գրքի լույս տեսնելուց հետո ողջ աշխարհում եռում էին կրքերը և կարծիքների պայքար էր գնում՝ դարվինիզմին կողմ և դարվինիզմին դեմ: Որոշները պիտակավորում էին Դարվինին, մյուսները՝ հիանում նրանով, իսկ Չարլզ Դարվինը շարունակում էր աշխատել:

Նա էվոլյուցիայի հարցերով ևս երեք գիրք գրեց: Էվոլյուցիայի գոյությունը ճանաչվել էր գիտնականների մեծամասնության կողմից դեռ Դարվինի կենդանության ժամանակ, այն դեպքում, երբ բնական ընտրության նրա տեսությունը՝ որպես էվոլյուցիայի հիմնական բացատրություն համընդհանուր ճանաչում է գտել միայն 20-րդ հարյուրամյակի 30-ական թվականներին:

Դարվինի գաղափարները ու բացահայտումները վերամշակված տեսքով ձևավորում են էվոլյուցիայի ժամանակակից սինթետիկ տեսության և կենսաբանության հիմքը՝ որպես կենսաբազմազանության տրամաբանական բացատրություն ապահովող: Դարվինի գիտության հետևորդները զարգացնում են էվոլյուցիոն մտքի ուղղությունը, որը կրում է նրա անունը՝ Դարվինիզմ:

Հարցեր, պատասխաններ, մեկնաբանություններ