Ապրիլի 6-ին ծնվել է ռուս վիրաբույժ, պրոֆեսոր Նիկոլայ Վասիլևիչ Սկլիֆոսովսկին

Սլիֆոսովսկին վիրաբուժության վերաբերյալ ավելի քան յոթանասուն արժեքավոր աշխատանքների հեղինակ է, այդ թվում՝ ռազմական վիրաբուժության: Նա մշակել է վիրաբուժական վարակազերծման, գործիքների տաք մշակման և բժշկական հագուստի  մեթոդիկան: Նրա մեթոդիկայի շնորհիվ  գործնականում ամբողջությամբ բացառվեցին հետվիրահատական վարակումներն ու  բարդացումները: 

Նիկոլայ Վասիլևիչ Սկլիֆոսովսկին ծնվել է 1836 թ. ապրիլի 6-ին (մարտի 25) Հերսոնյան նահանգի Դուբոսսար քաղաքի մոտակայքում: Օդեսայի գիմնազիան ավարտելուց հետո ընդունվել է Մոսկովյան համալսարանի բժշկական ֆակուլտետ: 1859 թ. ղեկավարել է Օդեսայի քաղաքային հիվանդանոցի վիրաբուժական բաժանմունքը: 1863 թ. դարձել է բժշկության դոկտոր:

1866-ից Սկլիֆոսովսկին աշխատել է Գերմանիայում ախտաբանա-անատոմիական ինստիտուտի ռազմական լազարեթում, ապա Ֆրանսիայում և Անգլիայում:

Ռուսաստան վերադառնալով՝ նա հրապարակել է բազմաթիվ աշխատանքներ։ Նիկոլայ Վասիլևիչը հրավիրվել է Կիևի համալսարանի վիրաբուժության ամբիոն, որտեղ 1870 թ. ստացել է պրոֆեսորի կոչում։ Այնուհետև իր գործունեությունը շարունակել է Սանկտ-Պետերբուրգի Կայսերական բժշկա-վիրաբուժական ակադեմիայում: 1880 թ.-ից  Սկլիֆոսովսկին Մոսկովյան համալսարանի բժշկական ֆակուլտետի պրոֆեսորը և դեկանն էր, իսկ 1893-1900 թթ. նա գլխավորել է բժիշկների կատարելագործման ինստիտուտը Պետերբուրգում: 

Սկլիֆոսովսկին դաշտային վիրաբույժ Նիկոլայ Պիրոգովի հետ աշխատել է նաև Չերնոգորիայի ռազմական կլինիկաներում: Զարգացնելով Պիրոգովի հայացքները՝ Սկլիֆոսովսկին զգալի ներդրում է կատարել ռազմա-դաշտային վիրաբուժության զարգացման ոլորտում: 

Հենց Նիկոլայ Վասիլևիչն է նպաստել սովետան վիրաբուժության մեջ անտիսեպտիկայի և ասեպտիկայի սկզբունքների ներդրմանը: Նա դարձել է խոռոչային վիրաբուժության պիոներներից մեկը որովայնի հիվանդությունների, լյարդի, մեզապարկի և կանանց հիվանդությունների օպերատիվ բուժման  ասպարեզում, մշակել է կեղծ հոդերի դեպքում ոսկրերի միացման  օրիգինալ վիրահատություն:

Սկլիֆոսովսկին զբաղվել է լուսավորչական գործունեությամբ. եղել է «Վիրաբուժական հասարակության տարեգիրք» ամսագրի համախմբագիրը (1891), բժիշկների Պիրոգովյան համագումարների նախաձեռնողը, Մոսկվայում Բժիշկների 12-րդ Միջազգային կոնգրեսի (1897) նախագահը, ռուս վիրաբույժների առաջին համագումարի (1900)  հիմնադիրը և նախագահը:

Սկլիֆոսովսկին մեծ հեղինակություն էր վայելում գործընկերների և հիվանդների շրջանում: Երբ նշվում էր նրա պրոֆեսիոնալ գործունեության 25-ամյակը, նա ստացել է ավելի քան 400 հեռագիր և մեծ քանակությամբ նամակներ աշխարհի շատ երկրներից:

Վերջին տարիներին՝ ինսուլտից հետո, հաստատվել է Պոլտավայի մոտակայքի իր ագարակում ու զբաղվել այգեգործությամբ:

1904 թ. դեկտեմբերի 13-ին (նոյեմբերի 30) Նիկոլայ Վասիլևիչ Սկլիֆոսովսկին վախճանվել է Պոլտավայի նահանգի Յակովեց գյուղում:

1923 թ. մեծ վիրաբույժի անունով անվանվեց Մոսկվայի շտապ օգնության գիտա-հետազոտական ինստիտուտը:

Հարցեր, պատասխաններ, մեկնաբանություններ