Սպիտակուց` մարդու իմունանբավարարության վիրուսի (ՄԻԱՎ) դեմ

Ավստրալիացի գիտնականներն ստեղծել են սպիտակուց, որն ընկճում է մարդու իմունանբավարարության վիրուսի (ՄԻԱՎ) բազմացումը` անմիջապես ազդելով իմունային համակարգի ախտահարված բջիջների վրա, հաղորդում է «Medical Xpress»-ը: Քվինսլենդի գիտահետազոտական  ինստիտուտի գիտնականների աշխատանքի արդյունքները տպագրվել են «Human Gene Therapy» ամսագրում: 

Գիտնականները մոդիֆիկացիայի են ենթարկել մարդու իմունանբավարարության կոդավորված Tat վիրուսը, որը պատասխանատու է ինֆեկցված բջիջներում վիրուսի վերարտադրման հատկության համար, դրանով ՄԻԱՎ-ի դեմ պայքարի «զենք» ստեղծելով: Tat-ի փոփոխությունը, որի նոր մոդիֆիկացիան ստացել է Nullbasic անվանումը, ընկճում է վիրուսի բազմացումը:

Բացի սպիտակուցից, գիտնականները ևս երկու տեսակի վեկտոր են մշակել` գենի փոխանցիչ-մասնիկները, որոնք կոդավորում են Nullbasic-ը: Երբ գենը հասնում է իմունային համակարգի բջիջներին, դրանք սկսում են արտադրել մոդիֆիկացված սպիտակուցը, որի ազդեցության արդյունքում վիրուսի ռեպլիկացիան նվազում է 8-10 անգամ: Բոլոր փորձարարությունները կատարվել են in vitro բջջային տարբեր հատվածներում:

«Ես երբեք նման բան չեմ տեսել, մոդիֆիկացված սպիտակուցն անընդմեջ աշխատել է: Դրա ազդեցության արդյունքում վիրուսի մոտ մնում է բջիջն ինֆեկցելու հատկությունը, բայց այն չի բազմանում»,- աշխատանքի արդյունքները մեկնաբանել է խմբի ղեկավար դոկտոր Հարիչը: Չնայած այն հանգամանքին, որ տվյալ մեթոդը դեռ հնարավորություն չի տալիս լիովին բուժել ՄԻԱՎ –վարակակիր մարդկանց, այնուամենայնիվ, այն վիրուսը դարձնում է լատենտ, կանխարգելելով պացիենտի մոտ ՁԻԱՀ (ՄԻԱՎ-ի վերջին փուլը) զարգացումը,- բացատրել է գիտնականը:

Գիտնականները մտադիր են շարունակել իրենց աշխատանքները, նրանք պլանավորել են այս տարի կազմակերպել նոր պատրաստուկի փորձարկումը կենդանիների վրա:

Հիշեցնենք, որ մարդու իմունանբավարարության վիրուսը բացահայտվել է 1983թ-ին: Անցնելով մարդու օրգանիզմ, այն վարակում է CD4+ բջիջները (լիմֆոցիտներ, մակրոֆագեր և այլն), որտեղ էլ սկսում է ակտիվորեն բազմանալ: Վիրուսի կործանարար գործունեության արդյունքը ինֆեկցված իմունային բջիջների ոչնչացումն է լինում:  

Հարցեր, պատասխաններ, մեկնաբանություններ