Մեզի տարբեր հետազոտությունների հանձնման կանոնները. abmed.am

Նախքան մեզի հետազոտությունը խորհուրդ չի տրվում այնպիսի մրգեր և բանջարեղեն ընդունել, որոնք կարող են ազդել մեզի գույնի վրա, ինչպիսիք են` ճակնդեղը, գազարը և այլն, միզամուղների ընդունումը նույնպես արգելվում է:

Մեզի նմուշը վերցնելուն պետք է նախորդի սեռական օրգանների հիգիենիկ լվացումը:

Խորհուրդ է տրվում դաշտանի ընթացքում մեզի հետազոտություն չկատարել:

Առավոտյան մեզը պետք է հավաքել որևէ տարայի՝ ցանկալի է դեղատներում վաճառվող հատուկ անոթի մեջ: Միզարձակման առաջին վայրկյաններին պետք է միզել զուգարանակոնքի մեջ, ապա, առանց միզարձակումը ընդհատելու, շարունակել հատուկ անոթի մեջ՝ մեզը հավաքելու համար: Մեզի անհրաժեշտ ծավալը, որպես կանոն, 50-100 մլ է: Այնուհետև ամուր փակել կափարիչը:

Դեղատներում վաճառվող տարաները ստերիլ են, և նախնական մշակում չի պահանջվում, սեփական տարա օգտագործելու դեպքում հարկ է նախապես մանրէազերծել այն:

Նեչիպորենկոյի փորձը

Նեչիպորենկոյի մեթոդով մեզի հետազոտության համար պետք է հավաքել առավոտյան միզարձակման միջին բաժինը՝ 15-25 մլ ծավալով:

Շուրջօրյա մեզի հավաքում (այդ թվում սպիտակուցի, միկրոալբումինի որոշման համար, Ռեբերգի փորձի, միզանյութի, միզաթթվի, կորտիզոլի որոշման նպատակով )

Ինչպես վերը նշվեց, լաբորատոր հետազոտությունների համար նախքան մեզը հավաքելը պետք է արտաքին սեռական օրգանների լվացում անել:

Մեզի առաջին՝առավոտյան բաժինը, չեն հավաքում, այլ միայն նշում են միզարձակման ժամանակը: Այնուհետև, երեք լիտրանոց տարայի մեջ հավաքում են առաջին միզարձակմից հետո նշված ժամանակին հաջորդող 24 ժամվա ընթացքում արտադրված մեզը՝ մինչև հաջորդ օրվա նույն ժամը:

Կարևոր լրացում

Օրական մեզի քննության իրականացման դեպքում, երբ որոշվում են

• մեզի մետանեֆրինները,
• օրական մեզով կալցիումի կորուստը,
• ադրենալինը, նորադրենալինը,
• դոֆամինը,

մեզն անպայման պետք է հանձնել կոնսերվանտով: Այդ կոնսերվանտը կարելի է ձեռք բերել դեղատանը (թեև հաճախ չի հանդիպում) կամ մեր կլինիկաներից մեկում:

Շուրջօրյա մեզի հավաքումը ցանկալի է իրականացնել հատուկ սանդղակավորված՝ 2.7 լ ծավալով պլաստիկե տարայի մեջ, որն ունի լայն վզիկ և ռելիեֆավոր բռնակ: Այն նույնպես կարելի է ձեռք բերել դեղատներում:

Պետք է միզել անմիջապես տարայի մեջ՝ յուրաքանչյուր միզարձակումից հետո ամուր փակելով կափարիչը: Մեզը պետք է պահել փակ տարայի մեջ՝ սառնարանի ստորին դարակում՝ չթույլատրելով սառեցումը:

Մեզը հավաքելուց հետո չափվում է վերջինիս հստակ ծավալը միլիլիտրերով և վերջինիս մի մասը հանձնվում է լաբորատորիա:

Դրա համար շուրջօրյա մեզի ծավալը փակ տարայի մեջ թափահարվում է, որից մոտ 50 մլ-ը լցվում է փոքր տարայի մեջ՝ մեզի կլինիկական հետազոտության համար: Ամբողջ մեզը պետք չէ հանձնել: Պարզապես բժշկական կենտրոնում հայտնեք շուրջօրյա մեզի ընդհանուր քանակությունը:

Մեզի հետազոտությունների հանձնման կանոնները. շուրջօրյա մեզի հավաքում` ըստ Զիմնիցկու

Հավաքվում է ամբողջ օրվա ընթացքում արտադրված մեզը՝ ընդամենը 8 չափաբաժին 8 տարայի մեջ՝ յուրաքանչյուրը 3 ժամ պարբերականությամբ:

Առավոտյան առաջին մեզի չափաբաժինը, ինչպես մնացած դեպքերում, չի հանձնվում:

Հաջորդող չափաբաժինները, որոնք արտադրվում են օրվա ընթացքում, գիշերը և հաջորդ օրվա առավոտյան, հավաքվում են տարբեր տարաների մեջ՝ 50 մլ ծավալով, յուրաքանչյուրի վրա նշվում է լցման ժամանակը:

Մեզի մեջ շաքարի որոշման նախապատրաստում

Շուրջօրյա մեզի քանակից լաբորատորիա է հանձնվում 50-100 մլ մեզ կամ մեզի 3 չափաբաժին, որոնք հավաքվել են օրվա ընթացքում 8 ժ ընդմիջումով.

• 1-ին չափաբաժինը՝ ժամը 8-ից 16-ը
• 2-րդ չափաբաժինը՝ ժամը 16-ից 24-ը
• 3-րդ չափաբաժինը՝ ժամը 24-ից մինչև առավոտյան ժամը 8-ը (ըստ բժշկի ցուցումների):

Ինչպես նախապատրաստվել մեզի ՊՇՌ հետազոտությունների իրականացմանը. տուբերկուլոզ, ցիտոմեգալովիրուս, սեռական ճանապարհով փոխանցվող վարակներ

Նախքան մեզի նմուշը վերցնելն անհրաժեշտ է կատարել արտաքին սեռական օրգանների հիգիենիկ լվացում: Մեզի նմուշը ստերիլ պլաստիկե տարայի մեջ վերցվում է առավոտյան` քաղցած, քնից անմիջապես հետո կամ վերջին միզարձակումից առնվազն 2-3 ժամ հետո: Հետազոտության համար անհրաժեշտ մեզի ընդհանուր ծավալը կազմում է 20 մլ:

Մեզի մանրէաբանական հետազոտությունների իրականացում

Մեզի նմուշը հավաքում են միայն ստերիլ տարայի մեջ: Մեզն անհրաժեշտ է հանձնել նախքան հակաբակտերիալ բուժումն սկսելը կամ բուժումից 3 օր անց: Եթե հիվանդն ընդունում է հակաբակտերիալ դեղեր, ապա պետք է որոշել դրանք ժամանակին հանելու հարցը:

Արտաքին սեռական օրգանների հիգիենիկ լվացումից հետո անհրաժեշտ է մեզի առաջին չափաբաժինը բաց թողնել զուգարանակոնք, միջին չափաբաժնից 3-5 մլ հավաքել ստերիլ հերմետիկ փակ տարայի մեջ: Մեզը պետք է հասցնել լաբորատորիա 1-2 ժամվա ընթացքում, եթե դա հնարավոր չէ, ապա մեզի փորձանմուշը կարելի է պահել սառնարանում՝ մեկ օրից ոչ ավելի:

Նմուշի տեղափոխման ժամանակ պետք է հետևել, որ խցանը չթրջվի:

Հարցեր, պատասխաններ, մեկնաբանություններ