Ինչպե՞ս նախապատրաստվել արյան հետազոտություն հանձնելուն. abmed.am

Ընդհանուր կանոնները հայտնի են, սակայն ավելորդ չէ նախքան արյան ցանկացած հետազոտություն հանձնելը վերհիշել ամենակարևոր կետերը:

• Արյունը պետք է անպայման հանձնել քաղցած և առավոտյան ժամերին: Սննդի վերջին ընդունումից հետո պետք է անցնի առնվազն ութ ժամ: Նախքան արյուն հանձնելը ծխելը ցանկալի չէ:
• Հետազոտության օրն արգելվում է վազքը, ծանրաբեռնվածությունները, սթրեսը:
• Ցանկացած դեղի ընդունումը պետք է բացառել կամ հասցնել նվազագույնի, եթե բացառելը վտանգավոր է: Սակայն, եթե ինչ-որ դեղ եք ընդունել, այդ մասին անպայման հաղորդեք բժշկին կամ լաբորանտին: Դա չափազանց կարևոր է հետազոտության տվյալները վերծանելու համար:
• Ցանկալի չէ արյուն հանձնել ֆիզիոմիջոցառումներից կամ այնպիսի հետազոտություններից հետո, որոնք ուղեկցվում են ճառագայթմամբ կամ օրգանիզմում գործընթացների ինտենսիվացմամբ:

Մենք նշեցինք առավել կարևոր կանոնները, որոնց հետևելու դեպքում հետազոտության տվյալներն ավելի ճշգրիտ կստացվեն և կրկնակի արյուն հանձնելու անհրաժեշտություն չի լինի:

Այժմ հատուկ հետազոտությունների մասին:

Գաստրին և պեպսինոգեն որոշելու համար անհրաժեշտ է արյունը հանձնել 12 ժամ քաղցած մնալուց հետո:

Հետազոտությունից մեկ շաբաթ առաջ անհրաժեշտ է ձեռնպահ մնալ ստամոքսի հյութազատման վրա ազդող դեղորայքից՝ Pepcedin, Zantac, Nizax, Ranimex, Esofex, Losec, Somac, Ranixal, Rani:

Հետազոտությունից մեկ օր առաջ անհրաժեշտ է ձեռնպահ մնալ ստամոքսի կողմից արտադրվող աղաթթուն չեզոքացնող դեղամիջոցներից՝ Alsucral, Balancid, Prepulsid, Metropam, Librax, Gaviscon:

Եթե դեղերի ընդհատման հետ կապված դժվարություններ են առաջանում, անպայման պետք է հայտնել բուժող բժշկին:

Արյունը հաձնելուց 3 ժամ առաջ չծխել:

Լիպիդային սպեկտորը որոշելու համար անհրաժեշտ է նախքան արյուն հանձնելը 12 ժամ քաղցած մնալ:

Հարցեր, պատասխաններ, մեկնաբանություններ