Արյան պարզ հետազոտությունը ցույց կտա, թե որքան արագ եք ծերանում

Մեծ Բրիտանիայի գիտնականները ներկայացրել են արյան նոր հետազոտություն, որը կարող է ցույց տալ, թե որքան արագ է մարդը ծերանում ու արդյո՞ք նրան սպառնում է դեմենցիայի վտանգ:

Այդ հետազոտությունը մարդու կենսաբանական տարիքը համեմատում է իսկական տարիքի հետ՝ հիմք ընդունելով արյան գենետիկ մարկերները: Մեթոդը ստեղծողների կարծիքով, այդ տվյալները կարող են փոխել բուժման մոտեցումները, չէ՞ որ շատ բան կախված է հիվանդի կենսաբանական տարիքից: Ինչպես բացատրել է պրոֆեսոր Ջեյմս Թիմոնսը՝ բժիշկները նշանակումներ անելիս սովորաբար հաշվի են առնում հիվանդի «խրոնոլոգիական» տարիքը, բայց խնդիրն այն է, որ, օրինակ, ոչ բոլոր 60-ամյա մարդիկ են կենսաբանորեն նույն տարիքի՝ մեկի օրգանիզմը կարող է մի քիչ ավելի երիտասարդ լինել, իսկ մյուսինը՝ ավելի ծեր:

Կենսաբանական տարիքի որոշման համար գիտնականների առաջարկած մեթոդով իրականացված փոքր ուսումնասիրությունը նույնպես հաստատել է դա: Գիտնականներն ուսումնասիրել են 70 առողջ կամավորներից վերցրած հետազոտությունները ու տեսել, որ ոմանց կենսաբանական տարիքն ընդամենը 60 է, իսկ մյուսներինը՝ 80-ից էլ անց: Բնականաբար, այդ մարդկանց բուժման տարբեր մոտեցումներ են պետք:

Կենսաբանական տարիքի իմացությունը նաեւ կարող է օգտակար լինել դոնոր փնտրելու հարցում: Օրինակ, այդ տարիքից կարելի է հասկանալ ՝ արդյո՞ք դոնորական երիկամն, իրոք, առողջ է ու կկարողանա ծառայել երկար տարիներ: Այդ իմացությունը կարեւոր է նաեւ տվյալ մարդու առողջության համար, չէ՞ որ կենսաբանական տարիքով է պայմանավորված, թե ինչ խնդիրներ ու հիվանդություններ կարող են հայտնվել:

Գիտնականների խոսքով՝ եթե առողջապահության համակարգը թույլատրի այս հետազոտությունը, ապա թերապեւտներն այն հեշտությամբ կկարողանան անել թե՛ պոլիկլինիկաներում, թե՛ հիվանդանոցներում:

Այս հետազոտության մասին հայտնում է Genome Biology ամսագիրը:

Հարցեր, պատասխաններ, մեկնաբանություններ