Առողջությունն ամեն ինչ է, առանց առողջության ամեն ինչ ոչինչ է. հարցազրույց պրոֆեսիոնալ բռնցքամարտիկ Արթուր Աբրահամի հետ

Հարցազրույց պրոֆեսիոնալ բռնցքամարտիկ Արթուր Աբրահամի հետ:

Ասում են սպորտն առողջության գրավականն է, սպորտին այդչափ մոտ կանգնած Արթուր Աբրահամն իրեն առողջ մարդ համարո՞ւմ է...: 

- Այո, քանի որ, փառք Աստծո, առողջական խնդիրներ չունեմ, վարում եմ առողջ ապրելակերպ` մարզվում եմ, չեմ ծխում, ալկոհոլային խմիչքներ և սուրճ չեմ օգտագործում (միայն հյուրասիրում եմ), չեմ չարաշահում ճարպոտ սնունդն ու քաղցրավենիքն, առհասարակ որևէ սննդատեսակ:

Ինչո՞ւ սպորտ և ինչո՞ւ բռնցքամարտ: 

- Փոքր տարիքից ես և եղբայրս սիրել ենք սպորտով զբաղվել: Նախքան բռնցքամարտիկ դառնալը, սովորել եմ Երևանի Կրկեսի շենքի հարևանությամբ գործող հեծանվադպրոցում, դարձել հեծանվասպորտի Հայաստանի բազմակի չեմպիոն: Եթե բռնցքամարտով չզբաղվեի, գուցե ֆուտբոլիստ դառնայի, այդ մարզաձևն էլ եմ շատ սիրում: Բռնցքամարտիկներից Մայք Թայսոնն էր իմ կուռքը և երազում էի նրան նմանվել, հենց դա պատճառ դարձավ, որ ընտրեցի այդ մարզաձևը: Տասնհինգ տարեկանում տեղափոխվեցի Գերմանիա: Գերմանացի մարզիչ Ուլի Վեգներն ու մենեջեր Վիլֆրիդ Զաուերլանդն իմ մեջ տեսնելով աշխարհի լավագույն բռնցքմարտիկ դառնալու հնարավորությունները, համաձայնեցին աշխատել ինձ հետ: Նշեմ, որ դպրոցում գերազանց եմ սովորել, ունեմ իրավաբանի մասնագիտություն: Բռնցքամարտիկի կարիերաս, ամենայն հավանականությամբ, կավարտեմ 2-3 տարի հետո. մինչև 2014թ. պայմանագիր ունեմ գերմանական «Զաուերլանդ Իվենթ» («Sauerland Event») փրոմոութերական կազմակերպության հետ: Դրանից հետո երևի կզբաղվեմ գործարարությամբ: Մարզիչ չեմ դառնա, քանի որ մարզիչ չեն դառնում, այլ ծնվում են, ինչպես իր գործը սիրող, սաներին անմնացորդ նվիրված, մեր հաղթանակներով ապրող իմ մարզիչը:

Մենամարտերի ժամանակ ստացած վնասվածքներն ի՞նչ հետևանք են թողնում: 

- Շատ բռնցքամարտիկների առողջության վրա դրանք, անկասկած, անհետևանք չեն մնում: Մեկ անգամ էլ ես եմ վնասվածք ստացել. թեև հաղթեցի Էդիսոն Միրանդային, սակայն ծնոտի լուրջ վնասվածք ստացա, վիրահատության ենթարկվեցի, կասկածի տակ դրվեց հետագայում ռինգ դուրս գալուս հարցը: Բայց, ինչպես տեսնում եք, հիմա ամեն ինչ կարգին է: 

Առօրյայում հաճա՞խ եք գործի դնում բռունցքի ուժը: 

- Ոչ: Թույլ չեմ տալիս, որ իրավիճակը հասնի դրան: Բացի այդ, բռնցքամարտիկների ձեռքերը, այսպես ասած` շղթայված են, սառը զենք են համարվում, և եթե առօրյայում գործի դնեմ բռունցքիս ուժը, դա կարող է լուրջ խնդիրներ առաջացնել:

 

Կցանկանայի՞ք, որ Ձեր ապագա կինը լինի մարզուհի, մասնավորապես, բռնցքամարտիկ: 

 

- Ողջունելի է, որ կանայք զբաղվում են սպորտով, բայց անկեղծ ասած, չէի ցանկանա, որ իմ ապագա կինը զբաղվի բռնցքամարտով: Դժվարանում եմ պատկերացնել, որ նա կարող է, օրինակ, աչքի կապտուկներով տուն գալ... 

 

Բռնցքամարտում ո՞րն է Ձեր ամենամեծ նվաճումը: 

 

- 2005թ. դեկտեմբերի 10-ին հաղթելով նիգերիացի Կինգսլի Իկեկեին` նվաճեցի բռնցքամարտի IBF վարկածով աշխարհի չեմպիոնի տիտղոսը: 

 

Խոսենք Ձեր առաջիկա ծրագրերի և անելիքների մասին: 

 

- Այժմ պատրաստվում եմ առաջիկա մենամարտին. WBO վարկածով աշխարհի գործող չեմպիոն Ռոբերտ Շտիգլիցի հետ մենամարտելու եմ օգոստոսի 25-ին, Բեռլինի «O2 World» մարզահամալիրում: Երջանիկ եմ, որ մենամարտը տեղի է ունենալու «O2 World»-ում. հուսով եմ այս հրաշալի մարզահամալիրում, առավելագույն թվով երկրպագուների ներկայությամբ, ցուցադրել իմ հնարավորությունները, այնպես, ինչպես 2009թ. կայացած մրցամարտի վերջին ռաունդում նոկաուտի ենթարկեցի Ջերմեյն Թեյլորին: Ծրագրել եմ կարիերայիս ավարտից հետո Երևանում (Ներքին Չարբախում) հիմնել մշակույթի կենտրոն, որտեղ երեխաները ոչ միայն կմարզվեն, այլև կտիրապետեն օտար լեզուների` գերմաներեն, անգլերեն... 

Ի՞նչ կմաղթեք «Առողջապահություն» հանդեսի սպորտասեր ընթերցողներին:

 

 

- Առաջին հերթին առողջություն: Առողջ լինելու և առողջությունը պահպանելու համար ամեն մարդ, անկախ մասնագիտությունից, պետք է առողջ ապրելակերպ վարի` չծխի, հեռու մնա թմրադեղերից, չօգտագործի ոգելից խմիչքներ կամ հազվադեպ խմի, չչարաշահի վնասակար սննդատեսակները, սպորտով զբաղվի: Առողջությունն ամեն ինչ է, և առանց առողջության ամեն ինչ ոչինչ է: Եղեք առողջ և հաջողակ: 

Հարցեր, պատասխաններ, մեկնաբանություններ