Բելգիայում շոկոլադի համով և հոտով նամականիշեր են թողարկվում

Բելգիական փոստն առաջին անգամ նամականիշեր է թողարկել շոկոլադի համով և հոտով, հաղորդում է РИА Новости-ն` հղում կատարելով ֆրանսիական պարբերականներին:

Շոկոլադի սիրահարները մարտի 25-ից կկարողանան միջազգային նամակագրության համար նախատեսված 5 նամականիշից բաղկացած խումբը գնել 6.20 եվրո գնով:

Չնայած շոկոլադի հոտով նամականիշեր առաջին անգամ չեն թողարկվում, սակայն հոտի և համի համադրությամբ նամականիշը նորություն է:

«Շոկոլադի համը ավելացվել է նամականիշի սոսնձվող հիմքին կակաոյի եթերային յուղերի ձևով, որը զգացվում է համտեսելիս: Ներկանյութը նաև շոկոլադի հոտ է արտազատում», - ասվում է փոստի հայտարարության մեջ:

Փոստի ներկայացուցչի խոսքով, հեշտ չէր դառը շոկոլադի «ճիշտ հոտը և համը» ստանալ, ինչի վրա համատեղ աշխատել են Բելգիայի, Գերմանիայի, Նիդերլանդների և Շվեյցարիայի մասնագետները:

Հարցեր, պատասխաններ, մեկնաբանություններ