Դերենիկ Դումանյանի հանդիպումը ԱՀԿ հայաստանյան գրասենյակի պատվիրակության հետ

ՀՀ առողջապահության նախարար Դերենիկ Դումանյանը հանդիպել է Առողջապահության համաշխարհային կազմակերպության հայաստանյան գրասենյակի պատվիրակությանը` Գայանե Ղուկասյանի գլխավությամբ:

ԱՀԿ ներկայացուցիչները նախարարին են ներկայացրել համատեղ իրականացվող ծրագրերը, մասնավորապես` ՀՀ առողջապահության նախարարության և Առողջապահության համաշխարհային կազմակերպության միջև ստորագրված 2012-2013թթ. երկամյա համագործակցության համաձայնագրի շրջանակներում ամրագրված տեխնիկական աջակցության ուղղությունները և գերակայությունները. Եվրոպական առողջապահության քաղաքականություն` Առողջություն 2020, առողջապահական համակարգերի հզորացում և հանրային առողջապահություն, ոչ վարակիչ հիվանդություններ, առողջության ամրապնդում և առողջ ապրելակերպ, վարակիչ հիվանդություններ, առողջության անվտանգություն և շրջակա միջավայր:

Դերենիկ Դումանյանը կարևորել է Առողջապահության համաշխարհային կազմակերպության դերը հատկապես փորձագիտական և խորհրդատվական օժանդակություն ցուցավերելու առումով: Նախարարը նշել է, որ ընտրված բոլոր ուղղություններն առաջնահերթություն են և կարևոր նախապայման առողջապահությունը մատչելի, հասանելի և որակյալ դարձնելու ճանապարհին:

Կողմերը քննարկել են նաև հետագա անելիքները և պայմանավորվել էլ ավելի սերտ համագործակցել:

Հարցեր, պատասխաններ, մեկնաբանություններ