Մինչև նոյեմբերի վերջ ՀՀ կառավարությանը կներկայացվի «Դեղերի մասին» նոր օրենքի նախագիծը

Ավելի քան 40 հայկական դեղագործական ընկերություններ՝ դեղ արտադրող և ներմուծող, ՀՀ կառավարության և պետական սեկտորի ներկայացուցիչների հետ միասին Ծաղկաձորում քննարկել են ոլորտում կատարվելիք էական բարեփոխումները։ 2010թ.-ից ի վեր սա թվով 4-րդ «Առանց փողկապների» երկօրյա հանդիպումն էր, որը կազմակերպվել է Հայաստանի դեղ արտադրողների և ներմուծողների միության կողմից ԱՄՆ Միջազգային զարգացման գործակալության «Ձեռնարկությունների զարգացման և շուկայի մրցունակության» («Ի-Դի-Էմ-Սի») ծրագրի օժանդակությամբ՝ միավորելով դեղագործության ոլորտի ներկայացուցիչներին և համապատասխան պետական մարմիններին ոլորտի գերակա խնդիրները և զարգացման առաջնահերթությունները քննարկելու համար։

Ինչպես տեղեկացնում են Հայաստանի դեղ արտադրողների և ներդրողների միությունից, ՀՀ առողջապահության նախարար Դերենիկ Դումանյանը և ՀՀ էկոնոմիկայի նախարար Տիգրան Դավթյանը ողջունել են ներկաներին նոյեմբերի 3-ին կայացած առաջին նիստին, որը նվիրված էր կառավարության մշակած դեղագործության/բիոտեխնոլոգիաների ոլորտի 2012-2015թթ. ռազմավարության շրջանակներում զարգացման առաջնահերթություններին։ Ռազմավարությունը կոչ է անում տեղական արտադրողներին 2013թ. կանոնակարգել իրենց կողմից իրականացվող գործառնությունները՝ Պատշաճ արտադրական գործունեության (ՊԱԳ) և Պատշաճ բաշխման գործունեության (ՊԲԳ) միջազգայնորեն ճանաչված ստանդարտներին համապատասխանելու համար։ Մասնակիցները քննարկեցին ընկերությունների կողմից իրականացվելիք գործողությունների ծրագրի առաջընթացը, ինչը նրանց կընձեռի ՊԱԳ և ՊԲԳ ստանդարտներին համապատասխանելու, վաճառքի ծավալները մեծացնելու, ինչպես նաև շուկայում առավել մրցունակ դառնալու հնարավորություն։

«Դեղերի մասին» նոր օրենքի նախագիծը ևս քննարկման առարկա է դարձել։ Վերջինիս նպատակն է համապատասխանեցնել տեղական դեղարտադրությունը եվրոպական ստանդարտներին և բարելավել հայկական դեղերի որակը։ Կողմերը հույս են հայտնել, որ նոր օրենքը կնպաստի հայկական արտադրողների մրցունակության բարձրացման և մասնաբաժնի ընդլայնմանը, ինչպես տեղական, այնպես էլ արտասահմանյան շուկայում։ Մասնակիցներին ներկայացվել են օրենքի նախագծում կատարված վերջին փոփոխությունները։ Նախագիծը վերջնական տեսքով կներկայացվի ՀՀ կառավարությանը մինչև նոյեմբերի վերջ։

Հարցեր, պատասխաններ, մեկնաբանություններ