Առաջարկություններ՝ առողջապահության ոլորտում բարեփոխումներ իրականացնելու համար

Այսօր Օքսֆամը և Քաղաքացիական հասարակության համագործակցության ցանցը (ՔՀՀՑ) «Քվեարկենք փոփոխությունների համար» ծրագրի շրջանակներում կազմակերպել էր կլոր սեղան հանդիպում։ Հրավիրվել էին ԱԺ պատգամավորներ՝ մասնակցելու   առողջապահության և գյուղատնտեսության ոլորտներում բարեփոխումների ծրագրերի ձևավորմանը:

ՔՀՀՑ  թվով քսանյոթ  կազմակերպություն ՀՀ հինգերորդ գումարման ԱԺ ընտրություններից առաջ նախաձեռնել էին «Քվեարկենք փոփոխությունների համար» քարոզարշավը, որի նպատակն էր  առողջապահության և գյուղատնտեսության ոլորտներում բարեփոխումների պահանջարկի ներկայացումը: Այդ նպատակով մշակվել էին «Բարելավված առողջապահական համակարգ» և «Զարգացած գյուղատնտեսություն» առաջարկությունների փաթեթները, որոնք ներկայացվել են բոլոր թեկնածուներին:  

Տնտեսական զարգացման հետազոտությունների կենտրոնի տնօրեն Կարինե Հարությունյանը ներկայացրեց առողջապահության ոլորտի ուսումնասիրությունների մասին զեկույցը:

 Մասնավորապես առողջապահության ոլորտում  նրանք առաջարկում են.

-Պետական մակարդակով բնակչության առողջապահական իրավունքների վերաբերյալ լայնածավալ իրազեկում իրականացնել:

-Առողջապահական համակարգի կառավարման կատարելագործում՝ համակարգի զարգացման ռազմավարության մշակում և առողջապահության մասին օրենքի ընդունում:

 -Ապահովել դեղերի մատչելիությունը, արդյունավետությունն, անվտանգությունն ու որակը:

-Առաջնային բուժօգնության ծառայություններին ուղղված պետական ֆինանսավորման ծավալների աճ՝ մատուցվող ծառայությունների որակի և քանակի հաշվառման համակարգերի ներդրմամբ:

-Սոցիալապես անապահով  բնակչության առողջության պետական ապահովագրության համակարգի ներդրում:

-Պետության կողմից երաշխավորված առողջապահական պետական նպատակային ծրագրերի շրջանակներում անվճար հիվանդանոցային բժշկական օգնություն և սպասարկում ստացող երեխաների ընդգրկվածությունն ընդլայնել՝ ներառելով առնվազն մինչև տասներկու տարեկան երեխաներին:

Զեկույցում նշված են նաև իրենց առաջարկություններն իրականացնելու հիմնավորումները և ճանապարհները: Ընդհանուր առմամբ կուսակցությունները հավանություն են տվել այս առաջարկություններին՝ որոշակի վերապահումներով:

Հարցեր, պատասխաններ, մեկնաբանություններ