Երևանի քաղաքապետարանում քննարկվել է ժամանակակից բուժծառայությունների մատուցման հարցը

Առողջապահության բնագավառում առկա իրավիճակի հետ կապված հարցերի լայն շրջանակ է քննարկվել քաղաքապետ Կարեն Կարապետյանի և համայնքային ենթակայության առողջապահական հաստատությունների ներկայացուցիչների հետ հանդիպման ժամանակ:
Ներկայացված տեղեկատվության համաձայն, բուժհիմնարկների շենքային պայմանները, ընդհանուր գնահատմամբ, գտնվում են բավարար վիճակում: Վերջին տարիներին մասնակի վերանորոգվել է բուժհաստատությունների մոտ 60 տոկոսը, կատարվել են շենքերի հիմքերի ամրացման, տանիքների, սանհանգույցների վերանորոգման, պատուհանների վերատեղադրման աշխատանքներ: Բուժհիմնարկներում սարքավորումների հագեցվածության մակարդակը կազմում է միջինը 40 տոկոս:

«Աոողջապահական հաստատությունների զարգացման և ժամանակակից պահանջները բավարարող բուժծառայությունների մատուցման
անհրաժեշտությունն այսօր հրամայական է: Պետք է փորձենք ճկուն մեխանիզմներ մշակել և գործարար կառույցների հետ համագործակցության դաշտում լուծումներ առաջարկել»,- նշել է քաղաքապետը: Կարեն Կարապետյանի համոզմամբ, սոցիալական ոլորտ լինելով հանդերձ, առողջապահությունը կարող է հետաքրքիր լինել ներդրումների համար և որակապես նոր մշակույթ ձևավորել բժշկական ծառայությունների առումով:

Մայրաքաղաքային տնտեսության մեջ ներդրումային միջոցների ներգրավումը համարելով գերակա ուղղություն, քաղաքապետը նշել է, որ այդ առումով որոշակի քայլեր են արվում նաև առողջապահության բնագավառում:

Մասնավորապես, «Պրոմ թեսթ» ընկերության հետ համագործակցության ծրագիր է քննարկվել գերժամանակակից կլինիկական լաբորատոր ծառայությունների մատուցման ասպարեզում, իսկ «Հարավկովկասյան երկաթուղի» ընկերության հետ դիտարկվել է նաև համայնքային բուժհաստատություններից մեկի հիման վրա համատեղ բժշկական հաստատության ստեղծելու հնարավորությունը:
Քաղաքապետարանը նաև համագործակցության առաջարկով դիմել է բժշկության ոլորտում մասնագիտացված միջազգային կազմակերպություններին, և արդեն արձագանքներ կան:

Երևանի քաղաքապետարանից հայտնում են, որ քննարկման արդյունքում քաղաքապետը առողջապահության ոլորտի պատասխանատուներին հանձնարարել է ծրագրային առաջարկներ ներկայացնել, որոնք կհանդիսանան ոլորտի զարգացման գլխավոր հայտանիշը:

Հարցեր, պատասխաններ, մեկնաբանություններ