Ինչպիսի՞ տոնային քսուկ ընտրել, որ չվնասի ձեր մաշկը

Տոնային քսուկը ունի տարբեր հավելումներ, որոնք օգտակար են մաշկի համար, խոնավացնող բաղադրատարրեր, մանրէասպան միջոցներ, վիտամիններ, արևապաշտպան ֆիլտրեր, բուսական մզվածքներ, որոնք պաշտպանում ու հարթեցնում են մաշկը։

Տոնային քսուք ձեր մաշկի տեսակի համար

Տոնային քսուքի ընտրությունը ուղղակիորեն պայմանավորված է մաշկի տեսակով։ Եթե ձեր մաշկը չոր է, ընտրեք այնպիսի տոնային քսուք, որը խոնավացնող բաղադրատարրեր է պարունակում։

Յուղոտ մաշկը մշտապես փայլում է, իսկ մաշկային ճարպի ավելցուկը բարդացնում է յուրաքանչյուր կոսմետիկական միջոցի օգտագործումը։ Հիմա գոյություն ունեն նաև յուղոտ մաշկի համար նախատեսված միջոցներ։ Յուղոտ մաշկի համար տոնային քսուքները յուղեր չեն պարունակում, իսկ դրա մասնիկները կլանում են մաշկի ավելորդ ճարպը։ Նման քսուքներն ավելի խիտ են, այնքան էլ բարակ չեն նստում, ինչպես չոր մաշկի համար նախատեսվածները։ Փոխարենը՜ յուղոտ մաշկը մի քիչ չորանում է տոնային քսուքով, և տհաճ փայլը վերանում է։

Խառը տեսակի մաշկ՝ քիթ-շրթունքների յուղոտ եռանկյունի և չոր ճակատ ու այտեր։ Այս դեպքում հարկ է սովորել ճիշտ քսել տոնային քսուքը։ Շատ լավ է նման դեպքերում օգտագործել տոնային քսուք՝ նախատեսված մաշկի թերությունները ծածկելու համար։ ճիշտ չէ ամբողջ մաշկը ծածկել քսուքով։ Դա անբնական ու անկենդան երանգ կտա։ Դրանից խուսափելու համար գնեք երկու տոնային քսուք, մեկը՝ ճիշտ ձեր մաշկի գույնի, մյուսը՝ ավելի մուգ։ Մուգ քսուքով ծածկեք քիթն ու այտոսկրերը, իսկ վրայից՝ ձեր մաշկի գույնի հետ համընկնող քսուքը։

Տոնային քսուքների տեսակները

Գոյություն ունի տոնային քսուքների մի քանի տեսակ։ Ամենախիտը տոնային հենքն է, որը խորհուրդ է տրվում օգտագործել միայն երեկոյան և ցերեկային դիմահարդարանքի համար։ Այն հիանալի է նայվում արհեստական լուսավորության տակ։ Ջրիկ քսուքը խորհուրդ է տրվում օգտագործել այն կանանց, ովքեր լավ մաշկ ունեն։ Ջրիկ տոնային քսուքը չի քողարկի մաշկի թերությունները, այլ ընդամենը միատարր կդարձնի գույնը։

Քսուք-դիմափոշին շատ հարմար է յուղոտ մաշկ ունեցողներին։ Այն շատ լավ վերացնում է անախորժ փայլը։

Եվ, վերջապես, ամենատարածվածը սովորական տոնային քսուքն է։ Այն ամենից շատ հարմար է չոր և նորմալ մաշկին։

Տոնային քսուքը քսելու գաղտնիքները

Առավելագույն բնական երանգ ստանալու համար հարկ է ջանալ, որ քսուքը հնարավորինս բարակ շերտով նստի մաշկին։ Ինչքան բարակ է քսուքի շերտը, այնքան լավ։ Չէ՞ որ ձգտում եք ընդամենը սրբագրել ձեր գեղեցկությունը, ոչ թե նոր դեմք նկարել։ Կարևոր չէ, թե ինչով եք քսում քսուքը՝ վրձինո՞վ, խծուծո՞վ, թե” պարզապես մատներով։ Կարևոր է լավ տարածել այն, որպեսզի շերտը հնարավորինս բարակ ստացվի։ Պետք է քսել ծնոտից դեպի ճակատը։ Նախ՝ ծնոտը, ապա այտերը և այտոսկրերը, վերջում՝ ճակատը։ Ուշադիր եղեք, որպեսզի քսուքի և մաշկի սահմանը չնկատվի, գույնը պետք է տարրալուծվի, որպեսզի դեմքը դիմակի չնմանվի։

Ինչպե՞ս ընտրել անհրաժեշտ երանգը

Որպեսզի ընտրվի տոնային քսուքի լավագույն երանգը, չարժե այն ձեռքի վրա փորձել, քանի որ ձեռքի մաշկն էապես տարբերվում է դեմքի մաշկից։ Ավելի լավ է գնել երկու-երեք փորձնական պարկուճ և տնային պայմաններում խնամքով քսել դեմքին։ Քսուքը պետք է քսել բարակ շերտով և ուշադիր նայել հայելու մեջ. պետք է ո՛չ հիվանդագին գունատություն լինի, ո՛չ արհեստական թխություն։ Լուսավորությունը նույնպես նշանակություն ունի, այնպես որ աշխատեք տոնային քսուքը փորձել ցերեկային բնական լույսի տակ։

Հարցեր, պատասխաններ, մեկնաբանություններ