Մեզի քանակի փոփոխությունները. armeniamedicalcenter.am

Մեզը կենսաբանական հեղուկ է, որը արտացոլում է օրգանիզմի վիճակը, իսկ նրա ցուցանիշները կարող են վկայել տարբեր օրգան-համակարգերի հիվանդությունների մասին:

Շատ դեպքերում միայն մեզի արտաքին տեսքից հնարավոր է ախտաբանական գործընթացների վերաբերյալ կարևոր հետևություններ անել, ինչը հատկապես վերաբերվում է երիկամային հիվանդություններին:

Օրվա ընթացքում արտադրվող մեզի քանակը կարող է և՛ երիկամային, և՛ սիրտ-անոթային համակարգի ախտաբանության ցուցիչ լինել:

Նորմայում մեզի օրվա քանակը կազմում է 1,5-2 լիտր: Այն կարող է փոփոխվել որոշ իրավիճակներում: Օրինակ, շատ հեղուկներ և սպիտակուցային մթերք ընդունելիս մեզի քանակն ավելանում է, և՝ հակառակը:  Մեզի քանակը պակասում է ֆիզիկական ծանրաբեռնվածության ժամանակ, երբ ուժեղացած է քրտնարտադրությունը: Մեզի քանակը տարբեր է նաև օրվա տարբեր ժամերին՝ այն շատանում է առավոտյան և ցերեկվա ժամերին, պակասում` երեկոյան և գիշերը:

Մեզի քանակից ելնելով տարբերում են.

 

• պոլիուրիա. մեզի մեծ քանակի արտադրություն՝ 2000 մլ-ից ավելի
• օլիգուրիա. մեզի քիչ քանակ՝ 500 մլ-ից պակաս,
• անուրիա. մեզի արտադրությունը պակաս է 50 մլ-ից:

Պատճառները: Պոլիուրիան դիտվում է երիկամների հիվանդության, շաքարային և ոչ շաքարային դիաբետների, հիպերպարաթիրեոզի ժամանակ և այլն:

Օլիգուրիան բնորոշ է երիկամային հիվանդություններին (պիելոնեֆրիտ, գլոմերուլոնեֆրիտ), քարով կամ ուռուցքով միզուղիների նեղացմանը: Մեզը պակասում է նաև ուժեղ արյունահոսության, ինտոքսիկացիաների, սով պահելու, մեծ մակերսով այրվածքների, զարկերակային ճնշման կտրուկ իջեցման ժամանակ:

Երբեմն օլիգուրիա անվանվում է նաև, երբ մեզի քանակը պակասում է միզապարկի լրիվ չդատարկվելու արդյունքում:

Մեզի արտահոսքի նվազում է տղամարդկանց մոտ պրոստատիտի ժամանակ, երբ մեծացած շագանակագեղձը սեղմում է միզածորանները, կամ կանանց հորմոնալ խանգարումների արդյունքում` ծննդաբերությունից հետո միզապարկի ատոնիայի հետևանքով:

Անուրիան մեծ մասամբ երիկամների լուրջ ախտաբանության դեպքում է դիտարկվում (գլոմերուլոնեֆրիտ, ոչ համապատասխան արյան ներարկում, թունավորում, սեպսիս, շոկ):  Անուրիա կարող է լինել քարի կամ ուռուցքի պատճառով` միզուղիների սեղմման հետևանքով:

Երկարատև անուրիայի ժամանակ զարգանում է ուրեմիա՝ մեզով չհեռացած նյութերով օրգանիզմի թունավորում:

Հարցեր, պատասխաններ, մեկնաբանություններ