ԵՊԲՀ ռեկտոր, պրոֆեսոր Դերենիկ Դումանյանի հղումը վեհաժողովի մասնակիցներին

Ինձ համար հաճելի պարտականություն է ջերմորեն ողջունել բոլորիդ Երևանի Մ. Հերացու անվան պետական բժշկական համալսարանի ստոմատոլոգիական ֆակուլտետի 50-ամյակին նվիրված միջազգային երկրորդ վեհաժողովի աշխատանքները սկսելու կապակցությամբ:

Ուրախությամբ տեղեկացնում եմ, որ մեր վեհաժողովի 700 մասնակիցների թվում ինչպես Հայաստանի և Արցախի լավագույն ստոմատոլոգներն են, այնպես էլ ԱՄՆ-ի, Կանադայի, Գերմանիայի Դաշնային Հանրապետության, Շվեյցարիայի, Ֆինլանդիայի, Իրանի, Ռուսաստանի Դաշնության, Ուկրաինայի, Վրաստանի պատվիրակությունները` իրենց ճանաչված մասնագետներով:

Ինչպես արդեն տեղեկացել եք ձեզ ներկայացված ծրագրից, վեհաժողովի օրակարգը բավական հագեցած է: Այս օրերին դուք ստոմատոլոգիայի ժամանակակից ձեռքբերումներին նվիրված հետաքրքիր զեկուցումներ կլսեք, ինչպես նաև կմասնակցեք աշխարհի ճանաչված մասնագետների կողմից տրվող հմտության դասընթացներին:

Հայաստանում ստոմատոլոգիայի զարգացման սկիզբը դրվել է 20-րդ դարի 30-ական թվականներին` Ա.Մաշուրի կողմից ատամնապրոթեզավորման առաջին լաբորատորիայի, ապա ատամնաբուժական դպրոցի հիմնադրումով:

«Ստոմատոլոգիա» առարկան բժշկական ինստիտուտում սկսել են դասավանդել 1946 թվականի հոսպիտալ վիրաբուժության ամբիոնում: 

Հանրապետության ազգաբնակչությանը բարձրակարգ բժիշկ-ստոմատոլոգների ծառայություն ապահովելու նպատակով Երևանի պետական բժշկական ինստիտուտում 1961-1962 ուսումնական տարում հիմնադրվեց ստոմատոլոգիական ֆակուլտետը: Ստոմատոլոգիայի նորաստեղծ ամբիոնը բարձրակարգ կադրերով համալրելու նպատակով ասպիրանտուրայում սովորելու համար Մոսկվա գործուղվեցին Իվետա Պետրոսյանը, Էդուարդ Կիլիկյանը, Էդուարդ Գևորգյանը: Իսկ Աննա Մինալյանը, ով այսօր մեր վեհաժողովի  պատվավոր մասնակիցներից մեկն է, 1963-ին դարձավ Երևանի պետական բժշկական ինստիտուտի առաջին նպատակային ասպիրանտը պրոֆեսոր Գեորգի Եղիյանի` ստոմատոլոգիայի առաջին դասախոսներից մեկի ղեկավարությամբ: 

Առիթն օգտագործելով ուզում եմ բոլորիս անունից երախտիքի խոսքեր հղել նրանց, ովքեր իրենց նվիրումով ծանրակշիռ դերակատարություն ունեցան բժշկության այս ոլորտը մեր երկրում կայացնելու և հետագա զարգացումն ապահովելու գործում: 

1963-69թթ. կազմավորվեց ստոմատոլոգիական, սանիտարահիգիենիկ և մանկաբուժական միացյալ ֆակուլտետը, որի առաջին դեկանը հյուսվածաբանության ամբիոնի վարիչ, դոցենտ Կ. Հ. Կարապետյանն էր: 

Սակայն գիտության զարգացող այս նոր ճյուղի` ստոմատոլոգիա մասնագիտության առանձնահատկությունները հաշվի առնելով նպատակահարմար գտնվեց առանձին ֆակուլտետ կազմակերպել: 1969-70 ուսումնական տարում կազմավորվեց ստոմատոլոգիական ֆակուլտետը` «1904-ստոմատոլոգիա» մասնագիտությամբ, իսկ դեկանի պաշտոնում նշանակվեցին պրոֆեսորներ Մ. Ս. Գավալովը և Գ. Գ. Նիկողոսյանը: 

Հետագայում դեկանի պաշտոնն ստանձնել են դոցենտներ Լ. Ա. Ֆրանգուլյանը, Միքայել Իսրայելի Հովհաննիսյանը, Ի. Գ. Պետրոսյանը, պրոֆեսորներ Վալերի Գուրգենի Տատինցյանը, Մարգարիտա Զավենի Բախշինյանը, Արամազդ Պարգևի Քանքանյանը և ուրիշներ: Այսօր ֆակուլտետի դեկանն է դոցենտ Լազար Կարլենի Եսայանը:

1967 թվականին ստոմատոլոգիական ֆակուլտետը տվեց իր առաջին` 47 շրջանավարտը: Նրանցից 39-ը տեղացիներ էին, 8-ը`սփյուռքահայեր:

Անցած 50 տարիների ընթացքում ֆակուլտետը զարգացման մեծ ճանապարհ է անցել: Դրան մեծապես նպաստել են համալսարանի մասնագիտական ամբիոններում իրականացվող գործնական և գիտահետազոտական աշխատանքները:

Ստոմատոլոգիական ֆակուլտետի մեծաթիվ շրջանավարտներից շատերն առաջնակարգ մասնագետներ են ոչ միայն Հայաստանում, այլև աշխարհի մի շարք երկրներում: Կեսդարյա հոբելյանը նաև ֆակուլտետի անցած տարիների շրջանավարտներին հարազատ հարկի տակ համախմբելու առիթ է:

Հարգելի գործընկերներ, սովորաբար նման համաժողովներում կատարվող քննարկումներն ու բանավեճերն անպտուղ չեն լինում: Ես վստահ եմ, որ միջազգային այս վեհաժողովի ներուժը նույնպես կնպատակաուղղվի ախտորոշման և բուժման գործնական կիրառություն ստացած նորագույն մեթոդներն ու եղանակները մեր երկրում ներդնելու գործին:

Կարծում եմ` երևանյան հանդիպումները նաեւ բարեկամական կապերն ամրացնելու և ջերմացնելու, նոր ծանոթությունների հրաշալի առիթ կդառնան:

Հարցեր, պատասխաններ, մեկնաբանություններ