Գրիգոր Տեր-Հակոբյան (Գրո). հայերեն առաջին բժշկագիտական բառարանի հեղինակ

2012-ը բժշկական համալսարանի երատավորներից մեկի` հոգեբուժության և նյարդային հիվանդությունների ամբիոնի հիմնադիր վարիչ (1930-37թթ.), մինչև 1930թ. ՀՀ առժողկոմատում մի շարք պատասխանատու պաշտոններ վարած, 1936-ին նյարդաբանական տերմինների հայերեն առաջին բժշկագիտական բառարանի հեղինակ, պրոֆեսոր Գրիգոր Աբրահամի Տեր-Հակոբյանի (Գրո) 125-ամյակի տարին է:

1905թ. Երևանում ավարտելով գիմնազիան Գ. Տեր-Հակոբյանը ընդունվել է Մոսկվայի համալսարանի բնագիտության ֆակուլտետ: 1906-ին ընդունվել է Օդեսայի համալսարանի բժշկական ֆակուլտետ, որտեղ ուսանելու տարիներին մասնակցել է ցույցերի, որոնցից մեկի ժամանակ ձերբակալվել է: Բանտարկությունից հետո մեկնել է Մոսկվա, հանձնել ավարտական քննությունները և ստացել բժշկի կոչում: 

Նորավարտ բժիշկը մի քանի տարի ղեկավարել է ՀՀ առժողկոմատի բուժական բաժինը, իսկ 1926թ. միաժամանակ որպես ասիստենտ աշխատել է Երևանի պետական համալսարանի բժշկական ֆակուլտետի հոգեբուժության ամբիոնում: 1930թ. նշանակվել է Երևանի բժշկական ինստիտուտի հոգեբուժության ամբիոնի վարիչ, որտեղ աշխատել է մինչև 1937 թվականը: 

Բարձր գնահատելով նրա գիտամանկավարժական գործունեությունը` Հայաստանի առժողկոմատին կից բարձրագույն ատեստացիոն հանձնաժողովն առանց գիտական թեզ պաշտպանության բժիշկ Գրիգոր Տեր-Հակոբյանին շնորհել է գիտության թեկնածուի աստիճան և պրոֆեսորի կոչում:

Նույն տարում` ստալինյան հալածանքների արդյունքում ձերբակալվել է և աքսորվել Ակմոլինսկ, այնուհետև` Կարագանդա: 

1947 թվականին` արդարացվելուց հետո վերադարձել է Երևան և նշանակվել մանկական լոգոպեդիկ կաբինետի, իսկ 1953-ին` փսիխոթերապիայի կաբինետի վարիչ:

Ի թիվս մի շարք աշխատությունների` Ա. Հ. Մելիքյանի հետ համատեղ նա կատարել է նաև «Նյարդային հիվանդություններ» դասագրքի առաջին թարգմանությունը:

Հարցեր, պատասխաններ, մեկնաբանություններ