Ներկայացվել է ԱԱՊ համակարգի ֆինանսավորման սիմուլյացիոն մոդելը

Վերջերս ՀՀ առողջապահության նախարար Հարություն Քուշկյանը հանդիպել է ԱՄՆ միջազգային զարգացման գործակալության HS-STAR ծրագրի ներկայացուցիչներին:

Հյուրերը նախարարին են ներկայացրել «Գրանցված բնակչության թվով Առողջության առաջնային պահպանման (ԱԱՊ) համակարգի ֆինանսավորման, ԱԱՊ բժիշկների բաշխման, կատարողականի և ԱԱՊ աշխատուժի պլանավորման»

վերլուծությունը՝ Երևանի ԱԱՊ համակարգի օրինակով։

HS-STAR ծրագրի կողմից իրականացված վերլուծության նպատակն էր ուսումնասիրել փաստացի գրանցված բնակչության թվի հիման վրա Երևանի ԱԱՊ հաստատությունների ֆինանսավորման պատկերը և բացահայտել ֆինանսավորման այդ մոդելին խոչընդոտող կամ ռիսկեր առաջացնող գործոնները, ինչպես նաև ներկայացնել առաջարկներ դրանց վերացման կամ նվազեցման վերաբերյալ։ Վերլուծվել է նաև ԱԱՊ բժշկական աշխատուժի հնարավոր բաշխման պատկերը վերոհիշյալ համակարգին անցում կատարելու դեպքում։

Ըստ վերլուծության արդյունքների, եթե ԱԱՊ ծառայության ֆինանսավորումն իրականացվի միայն գրանցված բնակչության թվաքանակով (Հայաստանում ԱԱՊ բժիշկ ընտրել ու գրանցվել է բնակչության 89,4%-ը), ապա Երևանի ԱԱՊ հաստատությունների ՙպակաս ֆինանսավորումը՚ հավասար կլինի չգրանցված բնակչության համար հաշվարկված գումարին։

HS-STAR ծրագրի ներկայացուցիչները ներկայացրել են ՙպակաս ֆինանսավորման՚ մեղմացման հնարավոր տարբերակները, ԱԱՊ չգրանցվածների բյուջեի՝ գրանցվածներին վերաբաշխման սիմուլյացիոն մոդելը և այդ մոդելի արդյունքների վրա հիմնված առաջարկները։

Վերլուծությունը նաև բացահայտում է Երևանի ԱԱՊ հաստատություններում աշխատող 829 բժշկից (ընտանեկան բժիշկ, մանկաբույժ, թերապևտ) 82%-ի սահմանված նորմատիվների համեմատ ոչ լրիվ դրույքով ծանրաբեռնվածություն: Այս թերծանրաբեռնությունը վերաբերում է ինչպես գրանցած բնակչության թվին, այնպես էլ բժշկին այցելած պացիենտների միջին օրական թվին:

Նախարար Քուշկյանը գերատեսչության համապատասխան պատասխանատուներին հանձնարարել է ակտիվացնել աշխատանքներն արձանագրված խնդիրները լուծելու համար, մասնավորապես` ըստ գրանցված բնակչության ֆինանսավորման համակարգի մարտահրավերները հաղթահարելուն միտված անհրաժեշտ ուղիներ մշակելու նպատակով։

Նախարարը հանդիպել է

ՀՀ առողջապահության նախարար Հարություն Քուշկյանն ընդունել է Իտալիայի Պիզայի համալսարանի մի խումբ սրտաբանների:

Ծանոթանալով Հայաստանում սրտաբանության  ոլորտում տիրող իրավիճակինª իտալացի մասնագետները բարձր են գնահատել ոչ միայն հայ կոլեգաների իմացությունը, այլև հիվանդանոցների տեխնիկական հագեցվածությունը: Սակայն դեռ կան ոլորտի որոշ ճյուղեր, որոնք զարգացման կարիք ունեն:

Հյուրերն առաջարկել են համագործակցել հենց այդ ուղղություններում, իրենց փորձը և հմտությունները փոխանցել հայ մասնագետներին,  էլ ավելի բարելավելով ոլորտը:

Առողջապահության նախարարը կարևորել է համագործակցությունը միջազգային փորձին ծանոթ մասնագետների հետ: Հարություն Քուշկյանը նշել է, որ փորձի փոխանակումը կնպաստի ոլորտի զարգացմանըª ոչ միայն բացերը լրացնելու, այլև առողջապահական համակարգը բարելավելու առումով:

Համագործակցություն հօգուտ շտապօգնության

Առողջապահության նախարար Հարություն Քուշկյանը,  Հայաստանում ԱՄՆ դեսպան Ջոն Հեֆերնը և ԱՄՆ ՄԶԳ հայաստանյան գրասենյակի տնօրեն Ջաթինդեր Չիման ստորագրեցին շտապօգնության ծառայությունների բարեփոխման գործընթացը շարունակելու մասին դրամաշնորհային պայմանագիր:

Փաստաթղթով նախատեսում է բարելավել շտապօգնության ծառայությունների վերաբերյալ հանրային իրազեկումը, տեխնիկական փորձագիտական աջակցություն տրամադրել առողջապահության նախարարությանը միջազգային չափորոշիչներին համապատասխան ռազմավարություն մշակելու համար, ինչպես նաև օժանդակել նախարարության աշխատակազմի շարունակական մասնագիտական զարգացմանը:

Ողջունելով հյուրերին` ՀՀ առողջապահության նախարար Հարություն Քուշկյանը շնորհակալություն է հայտնել ԱՄՆ կառավարությանը մեր երկրի առողջապահական համակարգի նկատմամբ մշտապես հոգատար վերաբերմունքի համար: Նախարարը նշել է, որ թեև շտապօգնության ծառայության արդիականացման ծրագրի մեկնարկը տրված է, սակայն դեռևս խնդիրներ կան: Դրանք կլուծվեն նաև դրամաշնորհային այս ծրագրի օգնությամբ:

«Երկամյա համաձայնագիրը USAID կազմակերպության հետ թույլ է տալիս, որպեսզի մենք կարողանանք բարելավել առողջապահական ծառայություններն այս ոլորտում, բարձրացնենք բուժօգնության մակարդակը և կարողանանք ստեղծել կառավարման նոր մեխանիզմներ»,- ընդգծել է առողջապահության նախարարը: Հարություն Քուշկյանը կարևորել է նաև, որ Հայաստանի առողջապահական համակարգի հետ ԱՄՆ կառավարության համագործակցությունը երկար տարիների պատմություն ունի և այդ ընթացքում կյանքի են կոչվել խոշոր ծրագրեր: Իսկ երկամյա այս  դրամաշնորհը 2010 թվականի օգոստոսին ՀՀ կառավարության և ԱՄՆ ՄԶԳ միջև ստորագրված` առողջապահական և սոցիալական բարեփոխումների շուրջ օժանդակության համաձայնագրի մի մասն է:

Առողջապահության նախարարը, Հայաստանում ԱՄՆ դեսպանն ու ԱՄՆ միջազգային զարգացման գործակալության հայաստանյան գրասենյակի տնօրենը պատասխանել են լրագրողների հարցերին: Կարևորելով առաջնային օղակում, մոր և մանկան առողջության պահպանման ու այլ ոլորտներում իրականացված արդյունավետ աշխատանքը, կողմերը վստահեցրել են, որ համատեղ ծրագրերը և համագործակցությունը շարունակական կլինեն:

Հարցեր, պատասխաններ, մեկնաբանություններ