ՔԿԱ օրգանների էնդոսկոպիկ հետազոտությունը «Իզմիրլյան» բժշկական կենտրոնում. Կարեն Սոկոլյան. izmirlianmedicalcenter.com

Մեր զրուցակիցն է «Իզմիրլյան» գիտա-բժշկական կենտրոնի բժիշկ, քիթ-կոկորդ-ականջաբան Կարեն Սոկոլյանը:

–  Ի՞նչ պատմություն ունի ՔԿԱ օրգանների էնդոսկոպիկ հետազոտությունը:

–  Քիթ-կոկորդ-ականջաբանությունում էնդոսկոպիկ վիրահատություններն ունեն մոտավորապես 30-40 տարվա պատմություն: Առաջին անգամ այն իրականացվել է Ավստրիայում, այնուհետեւ տարածվել Եվրոպայում և ԱՄՆ-ում: Հայաստանում էնդոսկոպիկ վիրահատություններ սկսել են իրականացնել 2000-ականներից: «Իզմիրլյան» բժշկական կենտրոնում արդեն վեց տարի է, ինչ կատարվում են քթի խոռոչի, ձայնալարերի էնդոսկոպիկ վիրահատություններ:

–  Ի՞նչ առավելություններ են գրանցվում էնդոսկոպիկ վիրահատության ժամանակ:

–  Էնդոսկոպիկ վիրահատությունների ամենահիմնական առավելություններից է այն, որ առավել ֆիզիոլոգիական են ու քիչ տրավմատիկ. կտրվածք չի կատարվում, քթի ոսկորը չի բացվում դիմացի հատվածից, կար չի դրվում: Այսինքն, ամբողջ վիրահատությունը կատարվում է քթի խոռոչի ներսից:

Առավելություն է նաեւ այն, որ վիրահատությունից հետո քթի խոռոչում տամպոններ չեն դրվում, հիվանդը հետվիրահատական ցավեր չի ունենում:

–  Կա՞ն հակացուցումներ:

–  Քթի, քթային խոռոչների հիվանդությունները կարելի է էնդոսկոպիկ եղանակով վիրահատել: Բացառություն են կազմում միայն չարորակ ծավալուն ուռուցքները, որոնք վիրահատվում են բաց եղանակով:

–  Նախավիրահատական ի՞նչ պարտադիր պայման կա:

–  Նախավիրահատական պարտադիր պայման է համակարգչային շերտագրությունը: Դա վերաբերում է բոլոր էնդոսկոպիկ վիրահատություններին:

–  Որքան հաճախ եք իրականացնում էնդոսկոպիկ վիրահատություններ:

–  Յուրաքանչյուր տարի իրականացվում է  130-140 վիրահատություններ, որոնց մոտավորապես կեսը կատարվում են էնդոսկոպիկ եղանակով:

Հարցեր, պատասխաններ, մեկնաբանություններ