«Իզմիրլյան» ԲԿ ընդհանուր և լապարոսկոպիկ վիրաբուժության բաժանմունքն` այսօր. Հրաչյա Բաղդասարյան. izmirlianmedicalcenter.com

Մեր զրուցակիցն է «Իզմիրլյան» բժշկական կենտրոնի ընդհանուր և լապարոսկոպիկ վիրաբուժության բաժանմունքի ղեկավար Հրաչյա Բաղդասարյանը:

– Տասնամյակից ավելի է, ինչ գործում է ընդհանուր և լապարոսկոպիկ վիրաբուժության բաժանմունքը: Ի՞նչ զարգացում եք արձանագրել այս տարիներին և ո՞ր ախտահարումների դեպքում կարող են դիմել բաժանմունք:

– Բաժանմունքը հիմնվել է 2000 թվականին: Մեր կենտրոնը նախկինում նեղ մասնագիտական` պրոկտոլոգիական ուղղվածության գիտահետազոտական ինստիտուտ էր: Հետագայում բացվեցին նոր բաժանմունքներ՝ այդ թվում նաև ընդհանուր և լապարոսկոպիկ վիրաբուժության բաժանմունքը:

Մեր մասնագիտական դիտարկման տակ են ստամոքսի, 12-մատնյա աղիքի, լյարդի, լեղապարկի, փայծաղի, լեղուղիների, ենթաստամոքսային գեղձի ախտահարումները: Բաժանմունքում կատարում ենք նաև տարբեր տեղակայման և տարբեր չափերի ճողվածքների դեպքում լապարոսկոպիկ մեթոդով վիրահատություններ` ալոպլաստիկ նյութերով, ցանցերի օգտագործմամբ: Մենք զբաղվում ենք նաև էնդոկրին վիրաբուժությամբ, մասնավորապես՝ վահանաձև գեղձի, մակերիկամների ախտահարումների ժամանակ:

Բաժանմունքը սերտ կապեր ունի եվրոպական և ամերիկյան վիրաբուժական կենտրոնների ու մասնագետների հետ, ովքեր ժամանակ առ ժամանակ գործնական այցով գալիս են մեր կենտրոն:

– Ի՞նչ բացառիկ միջամտություններ են կատարվել բաժանմունքում:

Վերջին տարիներին որովայնային վիրահատությունը հսկայական քայլերով առաջ է շարժվում՝ շնորհիվ քիչ ինվազիվ միջամտությունների: Համեմատական կարգով ասեմ, որ եթե 2000-ականների սկզբին մեր գործունեության մեջ լապարոսկոպիկ միջամտությունները քիչ տոկոս էին կազմում, ներկայում լեղաքարային հիվանդության բուժման ժամանակ լապարոսկոպիկ վիրաբուժությունն 90% և ավելի է կազմում:

Մեր բաժանմունքում կատարվել է ներմաշկային միջամտություն՝ լյարդի հաստության մեջ տեղակայված էխինոկոկային բշտի հեռացմամբ: Այսինքն, մաշկից բարակ ասեղով կատարել ենք պունկցիա՝ դատարկելով էխինոկոկի խոռոչը, և համապատասխան մշակման ենթարկելով, առանց անգամ լապարոսկոպիկ միջամտության, բուժել ենք էխինոկոկը:

Կա այսպիսի ախտորոշում՝ ենթաստամոքսային գեղձի սուր բորբոքումից առաջացած կեղծ կիստա: Ելքը երկար տարիներ եղել է բաց ավանդական վիրաբուժությունը: Հետո հնարավորություն ստեղծվեց բշտի դատարկումը էնդոսկոպիկ եղանակով: Մենք մի փոքր առաջ ենք գնացել և, չունենալով էնդոսկոպիկ սոնոգրաֆիայի հնարավորություն, համակարգչային տոմոգրաֆի հսկողության տակ, որովայնի առաջային պատից ծակելով ստամոքսի առաջային և հետին պատը, դրենավորել ենք ենթաստամոքսային գեղձի կիստան ու ստեղծել միջանցք կիստայի և ստամոքսի միջև: Հիվանդը միջամտությունից հետո մեկ տարի մեր հսկողության տակ է. վիճակը շատ լավ է, հիվանդության կրկնություն չկա:

– Ի՞նչ նոր ծառայություններ կան բաժանմունքում:

– Օնկոհեպատոլոգ Խաչատուր Բադալյանի հետ համատեղ մեր հիվանդանոցում իրականացվում են մեծածավալ վիրահատություններ լյարդի ուռուցքների դեպքում, մասնավորապես՝ լյարդի որոշակի մասի, սեգմենտի կամ երբեմն կեսի հեռացում:

Կատարվում են վիրահատություններ ենթաստամոքսային գեղձի ախտահարումների ժամանակ: Այդ միջամտությունները վիրաբուժության մեջ համարվում են ամենաբարդ վիրահատություններից. ժամանակատար, ծախսատար և տեխնիկապես բարդ:

– Որպես դինամիկ զարգացում ունեցող կենտրոն, ենթադրելի է՝ արդեն նոր գաղափարներ, նոր ծրագրեր ունեք:

– Մեր գիտական հետազոտությունների շրջանակում է գտնվում բարիաթրիկ վիրաբուժությունը: Այն բավականին երիտասարդ գիտություն է, բայց կարճ ժամանակում մեծ էվոլուցիա է ապրել՝ ուղղված է ճարպակալման դեմ: Սկզբնական շրջանում օգտագործվեց ստամոքսում բալոններ տեղադրելու մեթոդը, որպեսզի հիվանդը շուտ հագենա, հետո կիրառություն գտավ ստամոքսի բանդաժավորման մեթոդը, ավելի ուշ` գաստրոպլաստիկ վիրահատություները: Իհարկե՛, վիրաբուժության այս ուղղությունը պահանջում է մեծ ներդրումներ՝ թե մարդկային ռեսուրսի, թե՛ տեխնիկայի առումով:

– Ի՞նչ առավելություններ ունի Ընդհանուր և լապարոսկոպիկ վիրաբուժության բաժանմունքը:

– Բաժանմունքը, ինչպես և ամբողջ ‹‹Իզմիրլյան›› բժշկական կենտրոնը, կապիտալ վերանորոգված է, հագեցած է նորագույն սարքավորումներով պրոֆեսիոնալ անձնակազմով: Բաժանմունքում աշխատում են լուրջ մասնագիտական ճանապարհ անցած պրոֆեսորներ, դոկտորներ, գիտության թեկնածուներ: Ստեղծված է գիտակ վիրաբուժական թիմ, որը նաև ապահովված է իր գործունեության համար անհրաժեշտ ախտորոշիչ և վիրաբուժական բոլոր սարքավորումներով: Մենք քաջ գիտակցում ենք, որ բացի բժշկական պրոֆեսիոնալ մոտեցումից հիվանդին հետաքրքրում է նաև ֆինանսական քաղաքականությունը, ուստի մշակել ենք բոլոր հիվանդների համար հնարավոր ամենամատչելի տարբերակը: Կենտրոնն աշխատում է ապահովագրական ընկերությունների հետ, ընդունում է հիվանդներ նաև պետպատվերի շրջանակներում:

Հարցեր, պատասխաններ, մեկնաբանություններ