«Իզմիրլյան» ԲԿ անոթային վիրաբուժության բաժանմունքն ամփոփում է գործունեության 4 ամիսները. izmirlianmedicalcenter.com

Արդեն  4 ամիս «Իզմիրլյան» բժշկական կենտրոնում գործում է անոթային վիրաբուժության բաժամունքը:  Այսօր մեր զրուցակիցն է  բաժանմունքի ղեկավար բ.գ.թ.Վարդան Ոսկանյանը:

–  Ի՞նչ ծառայություն է իրականացնում նորաբաց բաժանմունքը:

–  Անոթային վիրաբուժության բաժանմունքում  իրականացվում են  զարկերակային և երակային բաց վիրահատություններ:

Վիրահատվում են  զարկերակների  բոլոր մակադակները՝ քնային, ստորին վերջույթների զարկերակային, աորտայի և նրա  ճյուղերի համակարգը: Երակային վիրահատություններն ուղղված են վարիկոզ հիվանդության բուժմանը. փոքր կտրվածքների միջոցով (մինիֆլեբեկտոմիա) կատարվում է հանգուցավոր լայնացած երակների հեռացում:

–  Հետազոտության ի՞նչ մեթոդներ են կիրառվում բաժանմունքում:

–  Մեզ համար ամենաանհրաժեշտ  ուսումնասիրությունն  անոթների դուպլեքս հետազոտությունն է: Անոթային վիրաբույժի համար դա նույնն է, ինչ  վնասվածքաբանի համար ռենտգեն հետազոտությունը: Դուպլեքս հետազոտության արդյունքները  հաճախ կարող են դառնալ ախտորոշման վերջնական պատասխաններ:  Կատարվում է նաև ավելի լայն հետազոտություն համակարգչային տոմոգրաֆիայի միջոցով: Այս առումով իր ուրույն տեղն ունի  նաև  համակարգչային տոմոգրաֆիան, մասնավորապես` անգիոգրաֆիկ հավելումով:

–  4 ամիսների ընթացքում կատարված վիրահատությունները վերլուծելով՝  անոթային ո՞ր խնդիրների դեպքում են մարդիկ ավելի հաճախ դիմում:

–  Ավելի շատ վիրահատություններ իրականցվում են երակային համակարգի վրա: Քնային զարկերակի 5 վիրահատություն ենք ունեցել, նույնքան էլ որովայնային աորտայի վրա կատարված  միջամտություններ : Իսկ զարկերակային համակարգում ամենաշատ կատարված վիրահատությունները ստորին վերջույթների զարկերակների վերակառուցողական միջամտություններն  են:

–  Արդեն հանդիպե՞լ եք բարդ դեպքերի:

–  Բուժել ենք հիվանդի, ում մոտ առկա էր աթերոսկլերոտիկ  ախտահարման միաժամանակ երկու տարբերակ՝  որովայնային աորտայի անևրիզմա  և  զստային  զարկերակի խցանում: Մենք իրականացրեցինք  անևրիզմայի մասնահատում և աորտաազդրային շունտավորում: Մոտավորապես 10 օրից հիվանդն առողջ դուրս գրվեց:

–  Ի՞նչն  է  ընկած արդյունավետ աշխատանքի հիմքում:

«Իզմիրլյան» կենտրոնի առավելությունը լավ կազմակերպված թիմային աշխատանքն է: Շատ հաճախ հիվանդը կարող է բժշկական կենտրոն գալ մեկ այլ առողջական խնդրով, իսկ հետազոտական գործընթացում ի հայտ գան անհապաղ բուժման ենթակա բոլորովին այլ հիվանդություններ: Այսինքն, այստեղ արդարացված է այն մոտեցումը, որ պետք է բուժել հիվանդին, ոչ թե հիվանդությունը:

–  Դինամիկ զարգացման գործընթացում ո՞րն է ձեր հաջորդ քայլը:

–  Մենք մեծ ցանկություն ունենք ներդնելու ռենտգեն էնդովասկուլյար վիրահատական մեթոդը: Դա է ապագան: Բաց վիրահատությունը շատ տրավմատիկ է: Բնությունից օրգանիզմն այնպես է ստեղծված, որ անոթները բավականին լավ քողարկված են, որպեսզի հեշտ չվնասվեն: Դա էլ իր հերթին միջամտական բարդություններ է ստեղծում: Այսպիսով, մեր հաջորդ քայլը բաժանմունքում փակ վիրահատության ներդրումը կլինի: Բավականին լավ թիմ է աշխատում բաժանմունքում, փորձառու բժիշկներ են, ում ջանքերով, համոզված եմ, կարող ենք իրականացնել մեր նպատակները:

Հարցեր, պատասխաններ, մեկնաբանություններ