«Սաղմերի կրիոկոնսերվացիայի արդյունքում կինը հինգ տարի անց կրկին երեխա է ունեցել». Գեորգի Օկոև

2005 թվականից Մոր և մանկան առողջության պահպանման գիտահետազոտական կենտրոնում արտամարմնային բեղմնավորման մեթոդի (ԱՄԲ) ժամանակ իրականացվում է նաև սաղմերի կրիոկոնսերվացիա (սաղմերի սառնապահպանում) (սառեցում հեղուկ ազոտի մեջ): Այդ մասին մեզ հետ զրույցում պատմեց Մոր և մանկան առողջության պահպանման գիտահետազոտական կենտրոնի ղեկավար, պրոֆեսոր Գեորգի Օկոևը`հավելելով, որ օրերս իրենց կենտրոնում հերթական ուրախալի լուրը գրանցվեց. սաղմերի կրիոկոնսերվացիայի արդյունքում կինը հինգ տարի անց կրկին երեխա է ունեցել:

 «Սովորաբար արտամարմնային բեղմնավորման ընթացքում ստացվում են մեկից ավելի սաղմեր, իսկ արգանդի խոռոչ են տեղադրվում ոչ ավել, քան 3-ը` նվազեցնելու հղիության և ծննդաբերության բարդությունները: Սաղմերի կրիոկոնսերվացիան մի կողմից թույլ է տալիս հետագայում  օգտագործել արգանդի խոռոչ չտեղադրված սաղմերը, մյուս կողմից, հաջորդ անգամ ձվարանների գերխթանման անհրաժեշտություն չի առաջանում, որը նվազեցնում է ինչպես  բժշկական հնարավոր բարդությունների հաճախականությունը, այնպես էլ  ֆինանսական ծախսերը», - բացատրեց բժիշկը:

Գ. Օկոևի փոխանցմամբ` հինգ տարին Հայաստանի համար մեծ թիվ է, բայց բժշկությունն աշխարհում ունի սաղմերն ավելի շատ տարիներ պահելու փորձառություն: «Ընտանեկան զույգն արտասահմանում երեխա է ունեցել ու տեղափոխվել ապրելու Հայաստանում`բերելով իր հետ սառեցված սաղմը. մի քանի տարի անց այս ընտանեկան զույգն ունեցավ ևս մեկ երեխա: Այնպես որ, այս մեթոդն արժանի է ուշադրության և ճիշտ մոտեցման դեպքում` կիրառման»,- ընդգծեց զրուցակիցը:

Գ. Օկոևն ասաց նաև, որ իրեն հաճախ են հարցնում, թե արդյո՞ք սաղմերի կրիոկոնսերվացիայի ճանապարհով ծնված երեխան լիարժեք է: «Պետք է ասեմ, որ բժշկությունն ունի արդեն մեծ փորձ և բազմաթիվ դեպքեր, ինչը թույլ է տալիս արդեն ապացուցողական բժշկության տեսանկյունից ասել, որ այդ երեխաները ոչ մի բանով չեն տարբերվում այն երեխաներից, ովքեր լույս աշխարհ են գալիս բնական ճանապարհով»:

Research Center of Maternal and Child Health Protection

Հարցեր, պատասխաններ, մեկնաբանություններ