Ինչո՞ւ են ցավում ամորձիները. պարզաբանում է ուրոլոգ Ռաֆայել Բադալյանը (տեսանյութ)

Med-practic-ի հետ զրույցում բ.գ.թ. ուրոլոգ Ռաֆայել Բադալյանը խոսել է ամորձու սուր ցավերից: Պատճառները` ըստ մասնագետի տարբեր են.

 
1. Սուր ցավեր ամորձիներում առաջանում են ամորձու ոլորման պատճառով: Սա պատանեկան տարիքում հանդիպող խնդիր է: Նման ցավն առաջանալուց հետո շատ քիչ ժամանակ է մնում մասնագետին` փրկելու հիվանդի ամորձին. մոտավորապես 6-8 ժամ: Հաջոցություն է, եթե ծնողները վաղ են ուշադրություն դարձնում երեխայի գանգատներին ու անհապաղ դիմում են մասնագետին: Թե՛ բժշկի, թե՛ հիվանդի համար լուրջ բարդություններ են ի հայտ գալիս, եթե ինչ-ինչ պատճառներով ուշացնում են: Արդյունքում` վիրահատական գործընթաց է տեղի ունենում. մեկ ամորձին, որպես կանոն, հեռացվում է, ու թեև հիվանդը տեղեկացվում է, որ մեկ ամորձին կարող է լիովին ծառայել կյանքի ընթացքում, սակայն  տղա երեխայի մոտ դա կարող է բավական լուրջ հոգեբանական խնդիր առաջացնել:

2. Ի դեպ, երիտասարդ հասակում /մինչև 45 տ./ հարկ է ուշադիր լինել յուրաքանչյուր տեսակի ցավի նկատմամբ: Չի բացառվում, որ ամորձում ուռուցքային գործընթաց է զարգանում:  Այս դեպքում միշտ չէ, որ տղամարդը, ի դեպ, գանգատվի սուր ցավերից, կարող են լինել թույլ արտահայտված ցավեր կամ՝ ընդհանրապես չլինեն: Այդ իսկ պատճառով տղամարդկանց խորհուրդ ենք տալիս, ինչպես կանանց (պարբերաբար շոշափել կրծքագեղձերը), շոշափել ամորձիները: Ցավ, գոյացություն, կոշտուկներ հայտնաբերելու դեպքում անհապաղ պետք է դիմել մասնագետի: Հիշեք, որ ամորձու ուռուցքային հիվանդությունների վաղ հայտնաբերումը ենթակա է մինչև 100%-անոց բուժման:

3. Ցավ ամորձիներում կարող են առաջացնել բորբոքումները. մակամորձու բորբոքումը:  Սա շատ հաճախ հանդիպող հիվանդություն է: Պատճառ կարող են հանդիսանալ նաև սեռավարակները և ո՛չ միայն:

4. Եվ, վերջապես, մեծահասակների մոտ ցավ ամորձիներում կարող են առաջանալ, եթե կա, օրինակ, աճուկային ճողվածք, որը թափանցվում է դեպի փոշտ և սկսում ճնշել ամորձին կամ ամորձիները: Բնական է, եթե հիվանդը  չի դիմել բժշկի, առաջինը սկսում է գանգատվել ամորձու կամ ամորձիների ցավից: Այլ կերպ, այսպիսի ցավերը կոչվում են ճառագայթող:

Ճառագայթող ցավեր կարող են առաջանալ նաև միզաքարային հիվանդության ժամանակ, ինչպես նաև ստորին սեռական օրգաններից. շագանակագեղձից:

Սովորաբար ուլտրաձայնային հետազոտությունն օգնում է ախտորոշելու խնդիրը, ավելի հստակ պատկերացնելու  բորբոքային օջախները, որից հետո միայն կատարվում են այլ լաբորատոր հետազոտություններ:

Հարցեր, պատասխաններ, մեկնաբանություններ