Շվեդիայում փորձարկում են երակների սքանավորման միջոցով վճարում կատարելու տեխնոլոգիան

Ավելի քան 1.600 շվեդ համաձայնել է մասնակցել մի ուսումնասիրության, որի շրջանակներում նրանք պետք է վճարումներ կատարեն նոր տեխնոլոգիայի միջոցով, որը թույլ է տալիս վճարել ձեռքի մի շարժումով։

The Daily Mail-ը մանրամասնում է, որ տեխնոլոգիան ձեռքի շարժման ընթացքում սքանավորում է վճարողի երակները։ Նշվում է, որ ամեն մարդու երակն ունի բացառիկ կառուցվածք, ուստի խարդախություն անելու հավանականությունն այստեղ զրոյական է։ Երակները սքանավորող տերմինալներն արդեն տեղադրվել են Լունդ քաղաքի 15 խանութներում և ռեստորաններում։ Տեխնոլոգիայի հեղինակը, ով մասնագիտությամբ ինժեներ է, պատմել է, որ վճարման այս մեթոդը շատ ավելի ապահով է, քան կրեդիտ քարտերով։

Աղբյուրը մանրամասնում է, որ վճարման նոր համակարգից օգտվելու համար մարդիկ պետք է սքանավորեն իրենց ձեռքի ափերը, ինչից հետո այդ պատկերն ուղարկվում է համապատասխան տվյալների բազա։ Այնուհետ բազա է ուղարկվում նաև նրանց սոցիալական ապահովագրության քարտի համարն ու հեռախոսահամարը։ Դրանից հետո ամեն անգամ, երբ հաճախորդը վճարում կկատարի, նա տեքստային կարճ հաղորդագրություն կստանա վճարվելիք գումարի վերաբերյալ։

Հայտնի է, որ մարդկանց հավանությանն արժանանալու դեպքում այս տեխնոլոգիան ավելի լայն կիրառում կստանա։

Հարցեր, պատասխաններ, մեկնաբանություններ