1889թ. մարտի 31-ին, 125 տարի առաջ, Փարիզում տեղի ունեցավ Էյֆելյան աշտարակի հանդիսավոր բացումը

1889թ. այս օրը նախագծող Գուստավ Էյֆելը աշտարակի գագաթին ֆրանսիական դրոշը բարձրացրեց: Այսօր Էյֆելյան աշտարակը Փարիզի ամենաճանաչված ճարտարապետական տեսարժան վայրն է: Այն ամբողջ աշխարհում հայտնի է որպես Ֆրանսիայի խորհրդանիշ: Նախագծողն ինքն այն ուղղակի 300 մետրանոց աշտարակ անվանեց:

Էյֆելյան աշտարակն ի սկզբանե որպես ժամանակավոր կառույց էր նախատեսված: Նրա նպատակը 1889թ. փարիզյան Համաշխարհային ցուցահանդեսին որպես մուտքային կամար ծառայելն էր: Ծրագրվում էր ցուցահանդեսից քսան տարի անց աշտարակը քանդել: Բայց կառույցի վերևում տեղակայված ռադիոալեհավաքները կառույցին փրկեցին նախատեսված քանդումից: 

Ֆրանսիական իշխանությունները Ֆրանսիական հեղափոխության հարյուրամյակի կապակցությամբ որոշեցին համաշխարհային ցուցահանդես կազմակերպել: Փարիզի քաղաքային վարչությունը հայտնի ճարտարապետ Գուստավ Էյֆելին դիմեց, որպեսզի վերջինս համապատասխան առաջարկ անի: Էյֆելը քննարկման համար իր 300 մետրանոց երկաթե աշտարակի գծագրերը ներկայացրեց, որոնք մինչ այդ պահը փոշոտվում էին իր սեղանին: Իսկ 1884թ. սեպտեմբերի 18-ին Էյֆելն իր աշխատակիցների հետ միասին նախագծի արտոնագիրը ստացավ: 

1886թ. մայիսի 1-ին ճարտարապետական և ճարտարագիտական նախագծերի մրցույթ բացվեց, որտեղ պետք է որոշվեր ապագա Համաշխարհային ցուցահանդեսի ճարտարապետական տեսքը: Այս մրցույթին 107  թեկնածու էր մասնակցում, բայց աշխատանքների մեծ մասն այս կամ այլ չափով կրկնում էր Էյֆելի կողմից առաջարկված աշտարակի նախագիծը: Արդյունքում Էյֆելի նախագիծը չորս հաղթողներից մեկը դարձավ: Այդ ժամանակ Էյֆելը վերջնական փոփոխությունները կատարեց՝ գտնելով ոսկե միջինը նախնական զուտ ճարտարագիտական կառույցի հատակագծի և դեկորատիվ տարբերակների միջև: 

Վերջիվերջո հանձնաժողովը կանգ առավ Էյֆելի ծրագրի վրա: Մրցույթում առաջին տեղը զբաղեցնելով՝ Էյֆելը ոգևորված բացականչեց. «Ֆրանսիան կլինի միակ երկիրը, որը 300 մետրանոց դրոշակաձող կունենա»:

Բացումից հետո ավելի քան քառասուն տարի Էյֆելյան աշտարակը աշխարհում ամենաբարձր կառույցն էր, գրեթե երկու անգամ բարձր էր այն ժամանակվա ամենաբարձր կառույցներից՝ Քեոփսի բուրգերից, Քյոնի և Ուլմերի տաճարներից: Բայց 1930թ.ն նրան գերազանցեց Նյու-Յորքի Քրայսլեր Բիլդինգը:

Հարցեր, պատասխաններ, մեկնաբանություններ