Աշխարհում առաջին անգամ առանց ձեռքի ծնված տղամարդուն ձեռք են փոխպատվաստել. news.am

Լեհ վիրաբույժները դոնորական ձեռք են փոխպատվաստել տղամարդուն, ով առանց ձախ վերջույթի է ծնվել եւ միայն աջ ձեռքով ապրել ավելի քան 30 տարի : Բժիշկների խոսքով՝ սա առաջին նման վիրահատությունն է համաշխարհային պրակտիկայում:

Աշխարհում ձեռքի փոխպատվաստման ընդամենը 80 վիրահատություն է կատարվել, սակայն վնասվածքների հետեւանքով ձեռքը կորցրած մարդկանց, այլ ոչ ի ծնե ձեռք չունեցող մարդկանց: Ի ծնե վերջույթի բացակայության փոխպատվաստման վիրահատություն է կատարվել նորածին սիամական երկվորյակներին Ինդոնեզիայում եւ Չինաստանում: Մեծահասակներին նման վիրահատություն իրականացնելը մինչեւ հիմա անհնար էր համարվում:

Հիվանդի անունը Պյոտր է, նա 32 տարեկան է: Բժիշկ Ադամ Դոմանաշիվիչի ղեկավարած վիրահատությունը դեկտեմբերի 15-ին իրականացվել է Վլոցլավի համալսարանական հիվանդանոցում (Wroclaw Medical University Hospital), որը տեւել է 13 ժամ: Այդ ընթացքում մասնագետների թիմն անդամահատել է դոնորական ձեռքը, միացրել հիվանդի մարմնին՝ ոսկրերն ամրացնելով տիտանով: Այնուհետեւ նրանք կարել են հիմնական մկանները, ջլերն ու անոթները: Դոնորական ձեռքի արյան շրջանառության վերականգնմանը զուգահեռ աճելու են նաեւ մնացած հյուսվածքները:

Հիվանդը գոհ է վիրահատության արդյունքից: Նա պատմել է, որ անհամբերությամբ սպասում է, թե երբ է երկու ձեռքով գրկելու իր ընտանիքի անդամներին: Պյոտրն արդեն կարող է շարժել մատները, բայց ոչ ամբողջ ձեռքը: Բժիշկները, սակայն, վստահեցնում են, որ դա ժամանակավոր խնդիր է, ավելի ուշ ձեռքը մեծ շարժունակություն կունենա:

Հարցեր, պատասխաններ, մեկնաբանություններ