Որովայնի առաջային պատի էսթետիկ ձևախախտումներ. ե՞րբ դիմել աբդոմինոպլաստիկայի. drtehmine.com

Որո՞նք են որովայնի առաջային պատի ձևախախտումների ուղղակի և անուղղակի պատճառները:  

Որովայնի առաջնային պատի ձևախախտումները հանդիպում են՝ անկախ տարիքից ու սեռից։ Հիմնական պատճառներն են՝ քաշի տատանումները, հորմոնալ շեղումները: Կանանց մոտ նպաստող է նաև ծննդաբերության գործոնը։

Խոսենք հետծննդյան աբդոմինոպտոզի մասին:  

Հետծննդյան աբդոմինոպտոզի պատճառներից է որովայնի առաջնային պատի թուլությունը, քաշի տատանումները՝ հատկապես այն կանանց մոտ, որոնք չեն հետևում սննդակարգին և ֆիզիկական առողջությանը։ Այս խնդրից խուսափելու համար շատ կարևոր է փորի մկանների ձգումը՝ նախքան հղիությունը։

Ինչպիսի՞ ձևախախտումներ կարող են լինել ճարպային լոկալ կուտակումների արդյունքում:  

Ճարպի կուտակման արդյունքում կարող է առաջանալ, ինչպես ընդունված է անվանել` «գոգնոց», երբ ճարպային լոկալ կուտակումը կարող է կախվել մինչև ծնկները։

Որպես որովայնի ձևախախտումների պատճառ` ի՞նչ հետևանքներ կարող են ունենալ հետվիրահատական սպիները:  
Հետվիրահատական սպիները կարող են որովայնի առաջային պատի ձևախախտումների պատճառ դառնալ որովայնի շրջանում իրականացված ցանկացած միջամտությունից հետո. որդանման ելունի հեռացում, կեսարյան հատում, որի դեպքում, ի դեպ,  կնոջ մոտ կարող են առաջանալ և՛ «գոգնոց», և՛ ձևախախտում՝ ցայլքի ստորին հատվածում։ Պլաստիկ վիրաբույժին դիմող կանայք, սովորաբար, ցանկանում են միաժամանակ լուծել և՛ «գոգնոցի», և՛ ձևախախտման խնդիրը։

Խոսենք որովայնի առաջային պատի ձևախախտումների փուլերի մասին:

Տարբերում են ձևախախտման արտահայտվածության թեթև, միջին և ծանր ձևեր, ըստ որի որոշվում է վիրահատության մեթոդը՝ լայնական, ուղղահայաց կամ կոմբինացված կտրվածք։

Փորձենք ընդհանրացնել ալիմենտար, հետծննդյան, հետվիրահատական աբդոմինոպտոզի հիմնական չափանիշները և բուժման մոտեցումները:  

Հիմնականում ձևախախտված առաջնային պատի կորեկցիան վիրահատական բուժում է պահանջում։

Ի՞նչ բարդություններ կարող են լինել որովայնի առաջային պատի ձևախախտումների արդյունքում:  

Որովայնի առաջային պատի ձևախախտումների արդյունքում կարող են առաջանալ ճողվածքներ։ Շատ կարևոր է հետազոտությունների պլանում ներառել որովայնի առաջային պատի ուլտրաձայնային հետազոտություն (ՈՒՁՀ)՝ պարզելու ճողվածքի առկայությունը: Եթե այն հաստատվում է, ապա պացիենտի մոտ միաժամանակ իրականացվում է երկու վիրահատական միջամտություն. աղիները հրվում են որովայնի խոռոչ,  ճողվածքը կարվում է, այնուհետև որովայնի առաջային պատին հատուկ ամրացնող ցանցեր են տեղադրվում, որից հետո միայն կատարվում է շտկում։  

Ինչպե՞ս է իրականացվում ձևախախտումների ախտորոշումը:  

Ախտորոշումն իրականացվում է տեսողական զննմամբ։ Գործիքային հետազոտություններից կատարվում է միայն ՈՒՁՀ։  

Ի՞նչ մեթոդներով են բուժվում որովայնի առաջային պատի ձևախախտումները:

Բուժումը հիմնականում վիրահատական է։ Սակայն հղիության շրջանում առաջացած ստրիաները կամ մաշկի սպիական փոփոխությունները կարելի է  բուժել մեզոթերապևտիկ միջոցներով։

Ի՞նչ է աբդոմինոպլաստիկան և ե՞րբ դիմել այդ մեթոդին:  

Աբդոմինոպլաստիկան որովայնի առաջնային պատի ձևախախտման շտկման վիրահատությունն է, որը համարվում է միջին ծավալի վիրահատություն։

Ի՞նչ բարդություններ կարող են առաջանալ վիրահատությունից հետո:

 
Տարբերում են սուր և ուշ շրջանի բարդություններ։ Սուր շրջանի բարդություններից են հեմոդինամիկ խանգարումները։ Առկա է թրոմբոէմբոլիաների առաջացման ռիսկ։ Կանխարգելման նպատակով բժիշկը կարող է հակամակարդիչ դեղեր նշանակել, նաև` բժշկական զուգագուլպաներ։ Հետվիրահատական շրջանում կարող է նեկրոզ առաջանալ։ Ուշ շրջանի բարդությունների առաջացմանը նպաստում են ֆիզիկական ծանրաբեռնվածությունն ու քաշի ավելացումը։  

Ի՞նչ է կարելի և ի՞նչ չի կարելի հետվիրահատական շրջանում:

Հետվիրահատական շրջանում պետք է խուսափել ֆիզիկական ծանրաբեռնվածությունից այդ թվում` սպորտային, 3-6 ամիս՝ վիրահատական բարդությունով պայմանավորված ։

Ինչպե՞ս կանխարգելել` խուսափելու որովայնի առաջային պատի ձևախախտումներից:  

Ինչպես արդեն նշեցի, շատ կարևոր դեր ունի որովայնի մկանների ձգումը՝ նախքան հղիությունը, ֆիզիկական վարժությունների միջոցով։ Պետք է հետևել սննդակարգին։    

Ինչպե՞ս կանխարգելել հետվիրահատական բարդությունները:

Հետևել բժշկի խորհուրդներին։

Հարցեր, պատասխաններ, մեկնաբանություններ