Աշխարհում կոսմետիկ վիրաբուժության հինգ անսովոր միտում. news.am

Փորձագետները նշել են աշխարհի տարբեր երկրներում կոսմետիկ վիրաբուժության 5 ամենազարմանալի միտումները: Այդ ցուցակում է հայտնվել հետույքի բրազիլական լիֆթինգը, ոտքերի երկարացումը եւ այլ անսովոր միջամտություններ:

Հարավային Կորեայում յուրաքանչյուր հինգերորդ կինը կամավոր դիմում է պլաստիկ վիրաբույժի դանակին: Իրանում (ինչպես եւ Հայաստանում) ժողովրդական է քթի վիրահատությունը, Բրազիլիայում՝ հետույքի լիֆթինգը, իսկ Արեւմուտքում՝ «դիզայներական հեշտոցների ստեղծումը»: Աճում է էսթետիկ բժշկութան զբոսաշրջության ժողովրդականությունն այնպիսի երկրներում, ինչպիսիք են ԱՄԷ-ն եւ Թայլանդը: Բրիտանական Anglia Ruskin University-ում էսթետիկ եւ պլաստիկ վիրաբուժության պրոֆեսոր, դոկտոր Ջեյմս Ֆրեյմը հայտնել է, թե իր կարծիքով որոնք են այդ ոլորտում  5 ամենաանսովոր միտումները:

Ոտքերի երկարացումը Հնդկաստանում

Փորձելով մեծացնել կարիերայի եւ երջանիկ ամուսնության շանսերը՝ շատ հնդիկներ անցնում են ոտքերի երկարացման ծայրաստիճան ցավոտ պրոցեդուրայով: Դրա օգնությամբ որոշ հնդիկներ իրենց հասակը երկարացնում են 10-15 սմ-ով: Այդ արդյունքին հասնելու համար օգտագործվում է Ռուսաստանում լավ հայտնի Իլիզարովի սարքը, որը սովորաբար կիրառում են վնասվածքների եւ ոտքերի ոսկրային անոմալիաների ժամանակ:

Հարավային Կորեա. դեմքի արմատական վիրաբուժություն

Հարավային Կորեայում պլաստիկ վիրաբուժության ինդուստրիան վերելք է ապրում: Վիրահատություններն այստեղ բավականին մատչելի են ֆինանսական առումով, դրանք արդյունավետ են եւ իրականացվում են տեխնիկայի վերջին խոսքով սարքավորված բժշկական կենտրոններում: Հենց այդ պատճառով Հարավային Կորեան պլաստիկ վիրաբուժության ոլորտում բժշկական զբոսաշրջության համաշխարհային կենտրոն է դարձել: Ինչ վերաբերում է իրենց՝ կորեացիներին, նրանք ձգտում են ավելի V-աձեւ կզակ ստեղծել, փոքրիկ քիթ, ինչպես նաեւ փոխել աչքերի ձեւը՝ ազատվելու ասիական արտաքինի բնորոշ գծերից եւ ավելի եվրոպական տեսք ունենալու:

Բրազիլական հետույք

2014-ին Բրազիլիան աշխարհում պլաստիկ վիրաբուժությունների անցկացման երկրորդ խոշոր կենտրոնն է դարձել, նրան բաժին է ընկել շուկայի 10,2 տոկոսը, ինչը զիջում է միայն ԱՄՆ-ի 20,1 տոկոսին: Վիրահատությունների մեծ մասը կապված է կրծքի, փորի եւ հետույքի ձեւի բարելավման հետ: Հետույքի բրազիլական լիֆթինգը հանրայնություն է ձեռք բերել, որն իրենից ներկայացնում է փորից վերցված ճարպի փոխպատվաստում հետույքի մասում առավել տպավորիչ մարմնաձեւերի ստեղծման նպատակով: Ի հավելումն դրան, տեղի կանայք նաեւ ֆիզիկական ծանրաբեռնվածության հատուկ ծրագիր են մշակել հետույքի մկանների ամրապնդման համար: Այդ վիրահատությունն իր մեջ զգալի ռիսկեր է պարունակում, ներառյալ ճարպային էմբոլիան, որը կարող է անգամ մահվան բերել:

Քթի վիրահատություններն Իրանում

Իրանում էսթետիկ վիրաբուժության վերելք է դիտարկվում, եւ այդ երկիրն արդեն տվյալ ցուցանիշով աշխարհում առաջատարների շարքում է: Այստեղ առավել ժողովրդական են համարվում լիպոսակցիան, հոնքերի պիգմենտացիան, ինչպես նաեւ քթի վիրահատությունը: Իրանը պահպանողական երկիր է, կանայք հանրության առաջ կարող են բացել հավանաբար միայն դեմքը, այդ պատճառով դիմագծերը հսկայական նշանակություն ունեն: Իրանում ամեն տարի կատարվող 40 000 կոսմետիկ միջամտությունից քթի վիրահատությանը բաժին է ընկնում  60 տոկոսը:

«Դիզայներական հեշտոցներ» արեւմուտքում

Կանացի սեռական օրգանների էսթետիկ վիրաբուժությունը ներառում է  «դիզայներական հեշտոցների» ստեղծում, ինչպես նաեւ ամոթաշուրթերի չափերի կրճատում, ինչը որոշ փորձագետներ համեմատում են կանացի սեռական խեղման հետ, ոչ թե էսթետիկ վիրաբուժության: Համարվում է, որ այդ վիրահատություններն, իբր, ուժեղացնում են կանանց զգացողությունները սեքսից, նրանց սեքսուալ առումով ավելի գրավիչ են դարձնում: Տվյալ վիրաբուժությունը բավականին բարդ է, եւ նվազագույն սխալների դեպքում կանանց լուրջ խնդիրներ են սպառնում:

Հարցեր, պատասխաններ, մեկնաբանություններ