Սեռական ճանապարհով փոխանցվող ինֆեկցիաներ. izmirlianmedicalcenter.com

Սեռական ճանապարհով փոխանցվող ինֆեկցիաները բավականին հաճախ են հանդիպում: ԱՄՆ-ում տարեկան գրանցվում է մոտավորապես 20 միլիոն նոր դեպք, որոնց կեսը հայտնաբերվում է 15-24 տարեկան անձանց մոտ:

Կան սեռական ճանապարհով փոխանցվող զանազան հարուցիչներ, որոնք առաջացնում են տարբեր հիվանդություններ: Ստորև կներկայացվեն այդ հիվանդություններից առավել հաճախ հանդիպողները:

Գոնոկոկային ինֆեկցիա

Հարուցիչը Նեյսերի գոնոկոկն է: Սեռական ճանապարհով փոխանցվող ինֆեկցիաներից երկրորդ ամենահաճախ հանդիպողն է ԱՄՆ-ում: Գաղտնի շրջանը տևում է 7-14 օր: Տղամարդիկ հաճախ ունենում են այնպիսի գանգատներ, որոնք ստիպում են նրանց շտապ դիմել բժշկի օգնությանը: Ուստի սեռական ճանապարհով հիմնական փոխանցողները կանայք են, քանի որ նրանց մոտ հիվանդության ընթացքը հաճախ անախտանիշ է: Գոնոկոկային ինֆեկցիայի դեպքում կարող են առաջանալ միզուկի, շագանակագեղձի, մակամորձու, ամորձու, ուղիղ աղու և այլ օրգանների բորբոքումներ: Կանանց մոտ կարող են առաջանալ այնպիսի բարդություններ, ինչպիսիք են` կոնքի բորբոքային հիվանդությունները, արգանդափողերի սպիական փոփոխությունները, անպտղությունը, արտաարգանդային հղիությունը, քրոնիկական կոնքային ցավային համախտանիշը: Տարածուն գոնոկոկային ախտահարումները հազվադեպ են հանդիպում և կարող են դրսևորվել այնպիսի խնդիրներով, ինչպիսիք ենէ հոդաբորբը, մաշկաբորբը, ուղեղաթաղանթների բորբոքումը և սրտի խոռոչների բորբոքումը:

Խլամիդիային վարակ

Ամենահաճախ հանդիպող սեռական ճանապարհով փոխանցվող հարուցիչն է ԱՄՆ-ում: Գաղտնի շրջանը տևում է 3-14 օր: Հանդիպման հաճախականությունն առավել բարձր է 25 տարեկանն անց անձանց մոտ: Առաջացնում է միզուկաբորբ, մակամորձու և ամորձու բորբոքում, Ռեյտերի համախտանիշ (ակնաբորբ, միզուկաբորբ, հոդաբորբ): Տղամարդկանց մոտ չբուժված խլամիդիային ինֆեկցիայի հիմնական խնդիրը սեռական ճանապարհով փոխանցվելու մեծ հավանականությունն է: Ախտահարված կանանց ավելի քան 75%-ը կարող են անախտանիշ լինել: Վերել բարձրացող ախտահարումը կարող է հանգեցնել արգանդափողերում սպիական փոփոխությունների, կոնքային բորբոքային հիվանդությունների, արտաարգանդային հղիության, քրոնիկ կոնքային ցավային համախտանիշի, անպտղության:

Միկոպլազմա և ուրեոպլազմա

Ախտահարվածների մեծամասնությունն ունեն արտահայտված ախտանիշներ, սակայն մոտավորապես 25%-ի մոտ ախտանիշներ չեն դիտվում: Միկոպլազման և ուրեոպլազման չափերով այնքան փոքր են, որ կարող են անցնել բջջից ներս` խուսափելով օրգանիզմի իմունային համակարգի և օգտագործվող դեղորայքների ազդեցությունից և առաջացնել քրոնիկական բորբոքումներ: Կարող են սուր և քրոնիկ միզուկաբորբերի պատճառ լինել: Ռիսկի գործոններն են երիտասարդ տարիքը, վերջին մեկ ամսվա ընթացքում ունեցած սեռական հարաբերությունը, սեռական հարաբերությունը սեռական ճանապարհով փոխանցվող ինֆեկցիաներով ախտահարված կամ վերջիններիս կապակցությամբ բուժում ստացած զույգի հետ: Ախտորոշումը դժվարացած է հարուցչի ներբջջային տեղակայման պատճառով: Ախտորոշման եղանակներից սովորաբար օգտագործվում է ՊՇՌ մեթոդը:

Տրիխոմոնաս

Հարուցիչը Տրիխոմոնաս վագինալիսն է, որը պարազիտների շարքին է պատկանում և ախտահարում է հիմնականում միզային համակարգը: Վերջինս հեշտոցում բնակվող հաճախ հանդիպող մանրէներից է և տղամարկանց մոտ կարող է միզուկաբորբի պատճառ լինել:

Սեռական ճանապարհով են փոխանցվում նաև սիֆիլիսը, սեռական օրգանների հերպեսը, շանկրոիդը, մարդու պապիլոմա վիրուսը, մի շարք սնկային ախտահարումներ, մարդու իմունային անբավարության վարակը (ՄԻԱՎ), հեպատիտների մի քանի տեսակներ և մի շարք այլ ինֆեկցիաներ ևս, որոնք կարող են ախտահարել ինչպես միզասեռական համակարգը, այնպես էլ բազմաթիվ այլ օրգան-համակարգեր:

Սեռավարակների բուժման և ախտորոշման համար պետք է դիմել համապատասխան մասնագետի օգնությանը և երբեք չզբաղվել ինքնաբուժությամբ:

Գոռ Գրիգորիի Շադյան
«Իզմիրլյան» ԲԿ ուրոլոգ (հեռ. +374 94 33 41 99)

Հարցեր, պատասխաններ, մեկնաբանություններ