Մարդկության կեսը 2015 թ. մոտ կտառապի ալերգիայի այս կամ այն տեսակով

Ռուսաստանի իմունոլոգիայի ինստիտուտի տվյալներով՝ «10 տարի առաջ ալերգիայով տառապում էր մարդկության միայն մեկ քառորդ մասը, իսկ այժմ՝ մեկ երրորդ»:

Վիճակագրությունը ցույց է տվել, որ Մոսկվայում գարնանային ալերգիայից տառապում է ամեն երրորդը, Նյու Յորքում՝ վեցերորդը, իսկ Բեռլինում՝ չորրորդը: Մինչդեռ գյուղական միջավայրում, որտեղ ալերգեններն ավելի քիչ են տարածված, այս հիվանդությունով տառապողներն էլ են համեմատաբար ավելի քիչ:

Հիվանդությունները, որոնք մենք հիմա ալերգիաներ ենք անվանում, հայտնի են եղել դեռ Հին Եգիպտոսի ժամանակաշրջանում:

Սակայն ժամանակակից աշխարհում ալերգիաներով հիվանդանալու պատճառներն ավելի շատ են, քան Հին Եգիպտոսում: Կարելի է նշել դրանցից միայն մի քանիսը՝ քիմիական միջոցները, դեղորայքները, գործարանների արտանետումները, գենետիկորեն փոփոխված սննդամթերքները: Դրանց ավելացրած ստանդարտ պատճառները՝ փոշին, կենդանիների մորթին, ծաղկափոշին:

Ալերգիաներից պաշտպանվելու համար սկզբում պետք է բացահայտել այն պատճառը, որից մարդու մոտ սկսվում է այդ հիվանդությունը: Հայտնաբերելուց հետո անհրաժեշտ է այդ ալերգենը հեռացնել մարդու կյանքից, սակայն, ցավոք, դա ոչ միշտ է հաջողվում անել: Այդ պատճառով էլ ստիպված մարդիկ դիմում են դեղորայքների: Սակայն հարկավոր է հիշել, որ յուրաքանչյուր դեղորայք ընդունելուց առաջ հարկավոր է խորհրդակցել բժշկի հետ:

Ալերգիայից խուսափելու մեկ այլ միջոց ևս կա. հարկավոր է միշտ «արթուն» պահել իմունային համակարգը:

ԱՀԿ-ի տվյալներով՝ վերջին տասնամյակում ալերգիկների թիվը 20 տոկոսով աճել է: Գիտնականների կանխատեսումներով՝ այս թիվը կշարունակի աճել այն պատճառով, որ ժամանակի ընթացքում ալերգիան խթանող բազմաթիվ գործոններ են առաջանում, որոնք կապված են մեր ապրելակերպի և աշխատանքի հետ: Հետաքրքիր փաստ, որը ստիպում է մտածել ոչ միայն ալերգիայով հիվանդանալու հավանականության, այլև բնապահպանական ֆոնի մասին, որն էլ ալերգիայի աճի հիմնական պատճառն է հանդիսանում:

Հարցեր, պատասխաններ, մեկնաբանություններ