Պարզ վարժություն` արյան ճնշման մակարդակը նվազեցնելու համար. med.news.am

Արյան բարձր ճնշումն ամենամեծ տարածում գտած հիվանդություններից է: Այն ինսուլտի, ինֆարկտի եւ այլ առողջական խնդիրների պատճառ կարող է դառնալ: Եթե տառապում եք արյան գերճնշմամբ, անշուշտ գիտեք, որ «թվերը» նորմայի մեջ պահելու համար կենսակերպի լուրջ փոփոխություններ  են պահանջվում: Նատրիումի ցածր քանակություն ենթադրող դիետան, ֆիզիկական վարժությունները եւ նվազագույն սթրեսը բժիշկների առաջնային ցուցումներն են:

Հիմա արդեն գիտնականները նոր զենք են ավելացրել արյան բարձր ճնշման դեմ պայքարի զինանոցին: Խոսքը իզոմետրիկ ձեռնագնդի մասին է, տեղեկացնում է NewsMax Health-ը:

Կանադայում գտնվող  McMaster համալսարանի գիտահետազոտական խմբի անդամներն արյան բարձր ճնշմամբ տառապող հիվանդներին խնդրել են շաբաթական երեք անգամ մի քանի րոպե տեղությամբ էսպանդերին նմանվող գործիքով վարժություններ կատարել:

8-10 շաբաթվա ընթացքում հաստատուն դիետա պահպանող եւ նշանակված այլ վարժություններն իրականացնող հիվանդների սիստոլիկ ճնշումը` վերին ցուցանիշը, որը սրտի հարվածի ընթացքում զարկերակի մեջ արյան ճնշումն է արտացոլում, նվազել է 15 տոկոսով: Իսկ ահա դիաստոլիկ ցուցանիշը` հարվածների միջակայքում գրանցվող ճնշումը, նվազել է երեք կետով:  Թերապիայի այլ միջոցների արդյունքում գրանցվող փոփոխությունների համեմատ, այս միջոցը նշանակալի առաջընթաց է արձանագրում: Պատճառն այն է, որ ձեռքի շարժումների արդյունքում քներակի եւ այլ արյունատար անոթների պատերն առավել ճկուն են դառնում` սրտի ուղղությամբ առավել մեծ ծավալի արյան հոսք ապահովելով:

Ինչո՞ւ է այդպես.

«Արյան ճնշման նվազեցում ապահովող մեխանիզմները դեռեւս պարզ չեն մեզ համար, բայց դրանք, ամենայն հավանականությամբ, սրտի եւ արյունատար անոթների նյարդային կարգավորմանն են առնչվում», - նշել է գիտահետազոտական խմբի ղեկավար, կինեզիոլոգիայի պրոֆեսոր Մաուրեն ՄաքԴոնալդը:

Նրա ուսումնասիրության հիմքում դեռեւս 1960-ականներից կիրառվող պրակտիկան է. օդաչուները բարձր արագությամբ թռիչքի ժամանակ ճնշման հետ կապված բարդություններից խուսափելու համար էսպանդեր են օգտագործում:

Այդուհանդերձ, բժիշկները շտապում են նկատել, որ հիշատակված վարժությունը 140/90-ից բարձր ճնշում ունեցող հիվանդների համար բուժման միակ միջոց չի կարող համարվել: Այն ընդամենն արդյունավետ հավելում է բուժման ավանդական միջոցներին: Բացի այդ, հարկավոր է համոզվել, որ գործիքը հարմար է ձեռքի ափին եւ շատ թույլ չի սեղմվում, այնպես, որ երկու րոպե անց չկարողանաք ընդլայնմանը դիմադրել:

Ներկայացնենք մի քանի խորհուրդներ առ այն, թե ինչպես պետք է վարժությունը կատարել.

• գունդը սեղմելուց հետո սպասեք հինգ վայրկյան, այնուհետեւ բաց թողեք,
• կրկնեք վարժությունը երկու րոպեի ընթացքում, ապա եւս երկու րոպե հանգստացեք,
• կրկնեք վարժությունը մյուս ձեռքով,
• յուրաքանչյուր ձեռքով չորս անգամ կրկնեք վարժությունը,
• որոշ ժամանակ անց, գունդը սեղմված վիճակում, մի քանի վայրկյան ավելի երկար պահեք,
• կատարեք վարժությունը շաբաթական առնվազն երեք անգամ:

Հարցեր, պատասխաններ, մեկնաբանություններ