Աշխարհի ամենամեծ ընտանիքը. 87-ամյա ուկրաինացին ունի 346 ժառանգ (լուսանկարներ). news.am

Ուկրաինայի 87-ամյա բնակիչ Պավել Սեմենյուկը համապատասխան դիմում է ներկայացրել Գինեսի ռեկորդների գրքում գրանցվելու համար, գրում է Daily Mail-ը՝ մանրամասնելով, որ տղամարդն ունի աշխարհում ամենամեծ ընտանիքը:

Հայտնի է, որ Սեմենյուկն ունի 13 երեխա, 127 թոռ, 203 ծոռ ու 3 ծոռան երեխա՝ ընդհանուր 346 ողջ ժառանգ: Ի դեպ, նրանցից ամենափոքրը 2 շաբաթական է:

Ուկրաինացու ընտանիքն ապրում է Օդեսայի Դոբրոսլավ բնակավայրում: Մասնագիտությամբ շինարար Սեմենյուկը պատմել է, որ իրականում շատ երջանիկ է այսքան մեծ ընտանիք ունենալու համար: Նրա խոսքով՝ միակ դժվարությունը բոլորի անունները հիշելն է:

«Ես մեծերի անունները գիտեմ, բայց փոքրերինը չեմ հիշում»,-ասել է նա:

Հետաքրքրական է, որ ամեն անգամ, երբ ընտանիքի անդամներից որևէ մեկն ամուսնանում է, մյուսները նորապսակների համար նոր տուն են կառուցում գյուղում:

Հայտնի է, որ Սեմենյուկի որդիների, թոռների ու ծոռների մեծ մասը ևս շինարարներ են:

Աղբյուրը հավելում է, որ օրերս Սեմենյուկի ընտանիքը պաշտոնապես ճանաչվել է Ուկրաինայում ամենաբազմանդամը: Ներկայում Գինեսի գրքի վարկածով աշխարհի ամենաբազմամարդ ընտանիքը (192 անդամ) ապրում է Հնդկաստանում:

Հարցեր, պատասխաններ, մեկնաբանություններ