Հակոբյան Վիկտոր Թադևոսի (նվիրվում է ծննդյան ութսուն ամյակին)

Նրան բնորոշ է բազմակողմանի վիրաբուժական տաղանդը, իսկական կլինիցիստի լրջախոհությունը: «Ալմա մատեր» գիտական վիրաբուժական խորհրդի նախագահի դերում նա անկրկնելի էր և իր խորը վերլուծական ընդունակություններով ուղղորդում էր  խորհրդի գիտական գործունեությունը:

Պրոֆ. Է.Տ.Կարապետյան

Պրոֆոսոր Վիկտոր Հակոբյանը նախորդ դարի երկրորդ կեսի լավագույն վիրաբույժներից է:

Ծնվել է 1930թ. մայիսի 29-ին Թբիլիսիում, ծառայողի ընտանիքում:

1949 թ. ընդունվել է Երևանի բժշկական ինստիտուտ, որն ավարտել է 1955թ.: Հրաժարվելով տեսական մասնագիտության ասպիրանտուրայից՝ մեկնել է Ռուսաստան, գործնական աշխատանքի: Աշխատել է Լիպեցկի մարզի շրջաններից մեկում որպես գլխավոր բժիշկ և միակ վիրաբույժ: Ընտրվել է շրջանային խորհրդի աշխատողների պատգամավոր:

Ապա 1957թ. վերջից մինչև 1960թ. աշխատել է Ալավերդու քաղաքային հիվանդանոցի վիրաբուժական բաժանմունքի օրդինատոր: 1959թ. Լենինգրադում մասնագիտացել է ուռուցքաբանության մեջ:

1960թ. մրցույթով անցել է Մոսկվայի Բժիշկների կատարելագործման կենտրոնական ինստիտուտում կլինիկական վիրաբուժության 2-րդ ամբիոն: Լավ դպրոց է անցել այնպիսի ականավոր վիրաբույժների ղեկավարության ներքո, ինչպիսիք են Բ.Կ. Օսիպովը, Վ.Լ. Մանեվիչը, Ի.Բ. Ռոզանովը: 

1964թ. Մոսկվայում պաշտպանել է թեկնածուական դիսերտացիա «Կրծքավանդակի հիվանդությունների դեպքում ներոսկրային ֆլեբոգրաֆիան», որը ԽՍՀՄ-ում իր տեսակի մեջ առաջինն էր:

Այնուհետև աշխատել է ակադեմիկոս Ս.Խ. Ավդալբեկյանի կլինիկայում, որտեղ էլ անցել է մինչև պրոֆեսորի կոչման իր ճանապարհը:
Թոքերի աբսցեսին նվիրված դոկտորական դիսերտացիան պաշտպանել է 1971թ.:

1979թ. մրցույթով անցել է Երևանի բժշկական համալսարանի հոսպիտալային վիրաբուժության ամբիոնի վարիչի պաշտոնին: 1998-2007թթ.՝ ամբիոնի պրոֆեսոր: Ներկայումս «Արմենիա» հանրապետական բժշկական կենտրոնի խորհրդատուն է:
Այս տարիների ընթացքում` մանկավարժական և բուժական աշխատանքին զուգահեռ, կատարվել են նաև գիտական հետազոտություններ` մոտ 200 գիտական աշխատանք:

Գիտական հետաքրքրությունների շրջանն ընդգրկում է կրծքային, էնդոկրին վիրաբուժությունը: Կրծքային վիրաբուժության մեջ նրա ներդրումը վերաբերում է թոքային թարախակալումների բուժման մի շարք մեթոդների մշակմանը: Հանրապետության կլինիկական պրակտիկայում առաջին անգամ ներդրել է մկանային թուլության բուժումը, բրոնխիալ ասթմայի վիրաբուժական բուժումը: 70-ական թթ. աշխտանքներ է սկսել գլխավոր բրոնխների խուղակների բուժման ուղղությամբ՝ տրանսպերիկարդիալ, տրանսստերնալ պուլմոնէկտոմիայից և կոնտրալերգեն մուտքերից հետո:

Առաջին անգամ հանրապետությունում սկսել են կատարվել կերակրափողի պլաստիկա, կերակրափողի միջին կրծքային հատվածի քաղցկեղի դեպքում`ամբողջական պլաստիկա:

Որոշակի ներդրում ունի էխինոկոկոզի վիրաբուժության մեջ: Մշակվել է էխինոկոկոզի էխոմորֆոլոգիական դասակարգումը: Առաջին անգամ հանրապետությունում կատարվել է սրտի էխինոկոկային պարկի հեռացում: Առաջին անգամ, որքանով որ հնարավոր է դատել համաշխարհային գրականության տվյալներից, կատարվել է էխինոկոկային պարկերի միաժամանակյա հեռացում երկու թոքերից` ստերնոտոմիկ մուտքի միջոցով: Առաջին անգամ հանրապետությունում կատարվել է մեզենտերիկո-կավալային շունտավորման, պերիտոնեոյուգույլար շունտավորման վիրահատություն, ավշա-երակային անաստամոզ` պարանոցի վրա պորտալ հիպերտենզիայի դեպքում: Ընդհանրացվել է հանրապետությունում ենթաստամոքսային գեղձի ինսուլինով հեռացման առաջին փորձը: Մեծ ուշադրություն է հատկացվել լեղուղիների յաթրոգեն վնասվածքների բուժմանը: Այս խնդրին էր նվիրված 2005 թ. վավերագրային ճառը:

Վ.Տ. Հակոբյանը բժշկական բուհերի համար հայերեն լեզվով վիրաբուժական հիվանդությունների դասագրքի հեղինակն ու խմբագիրն է, «Աճուկային գերնիոպլաստիկա» մենագրության հեղինակը:

Հասարակական գործունեությունը ներառում է 70-ական թթ. Երևանի քաղաքային առողջապահության բաժանմունքի գլխավոր վիրաբույժի, 80-ական թթ. Հայկական ՍՍՀ առողջապահության նախարարության գլխավոր վիրաբույժի, լիցենզիոն հանձնաժողովի նախագահի, առողջապահության նախարարության IV վարչության խորհրդատուի աշխատանքները: Երկար տարիներ ղեկավարել է դիսերտացիաների պաշտպանության մասնագիտացված վիրաբուժական խորհուրդը: Վերջին տարիներին Հայկական վիրաբույժների ասոցիացիայի նախագահի տեղակալն էր:

ՀՀ բժշկական գիտությունների և Ռուսաստանի բնական գիտությունների ակադեմիաների գործող անդամ է:

Նկ.1 Հակոբյանը բժիշկների հետ՝ պարապմունքի ժամանակ

Մասնակցել է մի շարք միջազգային վեհաժողովների Քյոլնում, Մոսկվայում, Համամիութենական համագումարների և Անդրկովկասյան վիրաբույժների համագումարներին:

Պարգևատրվել է բազմաթիվ պատվոգրերով, «Գիտության և մշակույթի ասպետ» դիպլոմով, Մ. Հերացի շքանշանով:

Ստեղծել է վիրաբույժների դպրոց, որը ներկայումս հաջողությամբ աշխատում է «Արմենիա» բժշկական կենտրոնում՝ իրականացնելով բարդ միջամտություններ: Պատրաստել է 12 թեկնածուներ և 1 գիտությունների դոկտոր:

Նկ. 2 Հակոբյանն իր դիսերտանտի հետ

Հարցեր, պատասխաններ, մեկնաբանություններ