Հիշատակի խոսք. պրոֆեսոր Առնոլդ Արամի Ադամյան

77 տարեկան հասակում իր մահկանացուն կնքեց բարձրակարգ բժիշկ, ՌԲԳԱ ակադեմիկոս, Առողջապահության ազգային ինստիտուտի պատվավոր պրոֆեսոր Առնոլդ Արամի Ադամյանը, ով իր ամբողջ կյանքն անմնացորդ նվիրեց մարդկանց ծառայելու վեհ գործին: 

Առնոլդ Ադամյանի անունը ոչ միայն անջնջելիորեն ներառվել է հայրենական բժշկության, այլև մեր ժողովրդի պատմության մեջ, որպես Հայրենիքին ինքնամոռաց ծառայելու, ազնվության և մտավորականի վառ օրինակ: 

Ա.Վ.Վիշնևսկու անվան վիրաբուժության ինստիտուտի բաժնի ղեկավար, բժշկական գիտությունների դոկտոր, պրոֆեսոր, ՌԲԳԱ ակադեմիկոս Ա.Ա.Ադամյանն անցել է երկար և հիանալի ուղի, մասնագիտական գործունեության ոլորտում հասել բարձրագույն նվաճումների:

Ա.Ադամյանը գիտնական-վիրաբույժների ռուսական դպրոցի վառ ներկայացուցիչն էր, ժամանակակից պլաստիկ վիրահատության հիմնադիրներից մեկը, տաղանդավոր մանկավարժ և հիանալի կազմակերպիչ:

Ա.Ադամյանը ծնվել է Երևանում, ավարտել Երևանի պետական բժշկական ինստիտուտի բուժական ֆակուլտետը: Երիտասարդ բժիշկն իր աշխատանքային գործունեությունն սկսել է որպես վիրաբուժական բաժանմունքի ղեկավար Նոյեմբերյանի շրջանային հիվանդանոցում: Այնուհետև նրա հետագա մասնագիտական գործունեությունը որպես բժիշկ-օրդինատոր, կլինիկական օրդինատոր, ասպիրանտ, կրտսեր գիտական աշխատող, ավագ գիտաշխատող, լաբորատորիայի ղեկավար շարունակել է Ռուսաստանի բժշկական գիտությունների ակադեմիայի Ա.Վ.Վիշնևսկու անվան վիրաբուժության ինստիտուտում, որտեղ և պաշտպանել է թեկնածուական ու դոկտորական ատենախոսությունները,  իսկ 1983 թվականից նույն ինստիտուտում ղեկավարել է Վիրակապային, կարանային, պոլիմերային նյութերը վիրաբուժության մեջ բաժանմունքը:  2005 թվականին ընտրվել է Ռուսաստանի բժշկական գիտությունների ակադեմիայի իսկական անդամ:

Վիրաբուժության ոլորտում լինելով բարձրորակ մասնագետ Ա.Ադամյանը մշակել և հիմնավորել է պոլիմերային նյութերի օգտագործմամբ կրծքավանդակի օրգանների վերականգնման և պլաստիկ վիրահատությունների ժամանակ վիրաբուժության ռազմավարության մի շարք նոր կանոնակարգեր: Ա.Ադամյանը վիրակապային միջոցների և փոխպատվաստման զարգացման ուղղությամբ կատարել է անգնահատելի ներդրում: 

Նա  750-ից ավելի գիտական հոդվածների հեղինակ է, որոնք տպագրվել են աշխարհի տարբեր գիտական ամսագրերում, այդ թվում 8 մենագրություն, 1 ատլաս, 8 մեթոդական հանձնարարականներ, 10 գիտական աշխատությունների ժողովածու: Նա ավելի քան 90 գյուտերի հեղինակ է: Նրա ղեկավարությամբ պաշտպանվել են 48 թեկնածուական և 23 դոկտորական ատենախոսություններ:

Բժշկագիտության մեջ ներդրած գիտական, մանկավարժական, հանրային գործունեության համար  Ա.Ադամյանին շնորհվել է «ՌԴ վաստակավոր գյուտարար» կոչումը, նա պարգևատրվել է«Ժողովուրդների բարեկամություն» շքանշանով, «Աշխատանքի վետերան» մեդալով, ՌԴ կառավարության մրցանակի դափնեկիր, «Ճանաչում» մրցանակի դափնեկիր, Ռուսաստանի հայերի միության կողմից պարգևատրվել է «Ոսկե Խաչով»:  

Ա.Ադամյանը գործընկերների և բարեկամների հիշողության մեջ կմնա որպես վառ, ստեղծագործ անհատ, հազվագյուտ էրուդիցիայի տեր անձնավորություն, աննախադեպ ղեկավար, գիտնական, ով իր ամբողջ գիտակցական կյանքը նվիրեց սիրած մասնագիտությանը:

Ա.Ադամյանի մահն անդառնալի  կորուստ է հայ և ռուս ժողովուրդների համար:

Հարցեր, պատասխաններ, մեկնաբանություններ