Արյան հետազոտությունը կհուշի ծննդաբերության բարդությունների վտանգի մասին. news.am

Հղի կանանց արյան մեջ պարունակվող սպիտակուցը կարող է օգնել կանխատեսել ծննդաբերելիս վտանգավոր բարդությունների հավանականությունը եւ պտղի զարգացման խնդիրները: Այս մասին հայտնել են Queen Mary University (Մեծ Բրիտանիա) համալսարանի գիտնականները:

Գիտնականների խոսքով՝ DLK1 կոչվող սպիտակուցը մարդկանց եւ կրծողների մայրական արյան մեջ առկա է հղիության ժամանակ: Այն կարելի է օգտագործել պտղի առողջական վիճակը որոշելու նպատակով թեստեր մշակելիս եւ հետազոտություններ կատարելիս: Դրա օգնությամբ նաեւ կարելի է պարզել՝ բարդություններից խուսափելու համար, արդյո՞ք վաղաժամ ծննդաբերության կամ կեսարյան հատման անհրաժեշտություն կա: Պարզվել է, որ DLK1-ի ցածր ցուցանիշը կարող է վկայել պտղի վատ աճի եւ ծննդաբերելիս բարդությունների մասին:

Մինչեւ վերջերս գիտությանը քիչ բան էր հայտնի տվյալ սպիտակուցի ծագման աղբյուրի, դրա դերակատարման եւ այն մասին՝ արդյո՞ք այն կապված է պտղի առողջության հետ: Մկների վրա կատարված հետազոտություններով գիտնականները պարզել են, որ պտղի կամ մոր մոտ DLK1-ի արտադրման համար պատասխանատու գենի անջատումը պտղի զարգացման ընթացքում  հանգեցնում է մի շարք խնդիրների եւ ծննդաբերելիս` բարդությունների:

Հետազոտողները նաեւ հաստատել են, որ տվյալ սպիտակուցը սինթեզվում է սաղմում, իսկ դա նշանակում է, որ մայրական արյան մեջ դրա առկայությունը ուղղակիորեն վկայում է ապագա երեխայի կենսաբանական վիճակի մասին: Ահա, թե ինչու այս սպիտակուցի մակարդակի գնահատումը, ըստ գիտնականների, կարող է դառնալ պտղի զարգացման խնդիրների եւ ծննդաբերելիս բարդությունների կանխատեսման հուսալի ոչ ինվազիվ միջոց:

Հարցեր, պատասխաններ, մեկնաբանություններ