Նոր թեստի միջոցով կինը կարող է իմանալ իր ձվաբջիջների պաշարի սպառվելու մասին. news.am

Ամերիկացի մասնագետների մշակած նոր թեստը կօգնի անպտղության դեմ պայքարում. դրա օգնությամբ կինը կկարողանա իմանալ՝ արդյո՞ք ձվաբջիջների իր պաշարը սպառվում է: Թեստը մշակել է Նյու Յորքի մարդու վերարտադրողականության կենտրոնը: Մասնագետների խոսքով, կանանց 10 տոկոսն ունենում է ձվարանների վաղաժամ սպառման ախտանիշ, որի դեպքում ձվաբջիջների քանակն օրգանիզմում կրճատվում է:

Ի տարբերություն տղամարդկանց, որոնց օրգանիզմն ամբողջ կյանքում նոր սերմնաբջիջներ է արտադրում, կանայք լույս աշխարհ են գալիս այն բոլոր ձվաբջիջներով, որոնք երբեւէ ունենալու են: Դրանց քանակը նվազում է ժամանակի ընթացքում քանի դեռ չի սպառվում դաշտանադադարի պատճառով: Սակայն ձվարանների վաղաժամ հյուծման ախտանշան ունեցողների մոտ այս գործընթացը շատ ավելի արագ է կատարվում, դրա համար էլ նրանց դեպքում հղիության հետաձգելը վտանգավոր է, քանի որ մինչ այդ կինն արդեն կարող է անպտուղ դառնալ:

Նոր թեստի շնորհիվ հնարավոր է հետեւել հորմոնային փոփոխություններին ու գենետիկ արատներին, որոնք կնոջը մեծ ռիսկի են ենթարկում: Ենթադրվում է, որ այս թեստը հատկապես օգտակար կլինի 18-35 տարեկան կանանց ու աղջիկների՝ նաեւ նրանց համար, ովքեր բարձր ռիսկի խմբում են: Նման կանանց խորհուրդ է տրվում ավելի շուտ մայրանալ կամ էլ սառեցնել ձվաբջիջները, որպեսզի հետագայում օգտագործեն դրանք արտամարմնային բեղմնավորման բուժակարգի համար:

Այդ թեստի արժեքը մոտավորապես 100 դոլար է, ու առայժմ այն իրականացվում է միայն ամերիկյան կլինիկաներում: Շատ շուտով այն կիրականացվի նաեւ Եվրոպայում:

Հարցեր, պատասխաններ, մեկնաբանություններ